ᨄᨑᨀᨑᨊ ᨄᨛᨈ ᨕᨍᨗ ᨈᨚᨑᨙ ᨔᨗᨅᨓ ᨕᨉᨗ ᨀᨅᨙᨌᨛ᨞ ᨆᨀᨙᨉᨕᨗ ᨈᨕᨘᨕᨙ, “ᨕᨁ ᨊᨀᨑᨀᨑᨕᨗ?” ᨕᨛᨃ ᨔᨗᨐᨚᨋᨚ ᨁᨒᨘ ᨊᨅᨙᨀ ᨕᨉᨗ ᨀᨅᨙᨌᨙ ᨆᨋᨚᨕᨙ ᨒᨚᨇᨚ ᨒᨙᨆᨚᨒᨙᨆᨚ ᨕᨗᨈᨛᨒᨕ ᨒᨉᨘᨓ᨞ ᨕᨐᨈᨘ ᨁᨒᨘᨕᨙ ᨆᨚ ᨉᨙ ᨊᨆᨒᨚᨕ ᨊᨑᨙᨀᨚ ᨆᨒᨛᨅᨗᨊᨗ ᨄᨚᨒᨙᨄᨚᨒᨙ ᨕᨋᨙᨈᨚ᨞ ᨕᨗᨐᨑᨚ ᨁᨒᨘ ᨊᨅᨙᨀᨕᨙ ᨕᨉᨘ ᨀᨅᨙᨌᨙ ᨆᨚᨋᨚᨕᨙ ᨒᨚᨇᨚ ᨒᨙᨆᨚᨒᨙᨆᨚ ᨕᨗᨈᨛᨒᨕᨙ ᨒᨉᨘᨓ ᨉᨙᨈᨚᨆ ᨊᨆᨒᨚᨕ, ᨕᨒᨗᨕ ᨄᨚᨒᨙ ᨕᨋᨙᨕᨗ ᨊᨔᨅ ᨕᨒᨛᨅᨗᨑᨛᨊ, ᨊᨔᨅ ᨈᨚᨒᨗ ᨊᨄᨗᨐᨑᨕᨗ ᨕᨉᨗ ᨀᨅᨙᨌᨙ᨞
ᨊᨑᨈᨙᨊᨗ ᨕᨋᨙ ᨒᨗᨆ ᨒᨚᨕᨊ, ᨄᨚᨒᨙ ᨈᨗᨄᨗᨖ ᨄᨛᨈ ᨕᨍᨗ ᨈᨚᨑᨙ ᨆᨈᨘᨈᨘ ᨊᨔᨛᨂᨗ ᨆᨊᨊ ᨑᨗᨐᨚᨒᨚ ᨄᨚᨒᨙ ᨀᨗ ᨊᨙᨊᨙᨊ ᨉᨙ ᨕᨙ ᨊᨑᨄᨗ ᨊᨆᨊ ᨑᨔᨚᨔᨚᨑ ᨒᨛᨈᨘ ᨆᨀᨀᨘᨓᨕᨙ᨞ ᨌᨗᨐᨈᨚᨕᨗ ᨆᨅᨙᨑᨂᨗ ᨕᨉᨗ ᨀᨅᨙᨌᨙ ᨊᨔᨛ, “ᨄᨙᨀᨚᨕᨗ ᨌᨑᨊ ᨊᨕᨗᨐ ᨔᨗᨆᨘᨒᨆᨘᨒ ᨇᨙᨀᨕᨗ᨞ ᨈᨛᨄᨘᨕᨗ ᨓᨙᨀᨊ ᨈᨚᨒᨗ ᨕᨘᨄᨀᨛᨔᨗᨂᨗ ᨄᨗᨐᨑᨊ᨞ ᨊᨅᨛᨂ ᨊᨑᨈᨙ ᨆᨒᨛᨅᨗ ᨕᨋᨙ ᨒᨗᨆᨒᨚᨕᨊ, ᨊᨈᨛᨄ ᨆᨘᨕᨔᨛ ᨆᨊᨆᨘ᨞”
ᨔᨗᨐᨁᨊᨗ ᨀᨈᨚᨑᨚ ᨀᨛᨌᨆᨈ ᨈᨚᨒᨗ ᨊᨚᨋᨚᨕᨗ ᨅᨗᨌᨑᨅᨗᨌᨑᨕᨗ ᨉᨙᨍᨙ ᨁᨁ ᨆᨘᨒᨗ ᨄᨁᨓᨕᨗ ᨀᨛᨌᨆᨈᨕᨙ ᨄᨛᨈᨘᨕᨗ ᨅᨗᨌᨑᨕᨙ᨞ ᨆᨀᨛᨉᨕᨗ ᨄᨙᨁ ᨈᨘᨍᨘ ᨄᨙᨁ ᨔᨒ᨞ ᨈᨄᨔ ᨊᨚᨊ ᨔᨗᨑᨙᨄᨛᨀᨛ ᨀᨗ ᨀᨈᨚᨑᨚᨕᨙ ᨔᨙᨃ᨞ ᨆᨅᨗᨌᨑᨕᨗ ᨕᨀᨚᨑᨚ ᨀᨗ ᨀᨈᨚᨑᨚᨕᨙ ᨔᨙᨃ ᨓᨈᨘᨊ ᨔᨗᨑᨄᨛᨀᨛ, ᨕᨛᨃᨈᨚᨊᨗ ᨔᨅᨗᨊ ᨄᨛᨈ ᨕᨍᨗ ᨈᨚᨑᨙ ᨈᨚᨒᨗ ᨊᨄᨌᨘᨕᨙ ᨕᨗᨐᨔᨛᨕᨙ ᨕᨑᨘ ᨅᨈᨘ᨞ ᨈᨆᨊᨗ ᨄᨛᨈ ᨕᨍᨗ ᨈᨚᨑᨙ ᨀᨗ ᨒᨒᨛᨊ ᨀᨈᨚᨑᨚᨕᨙ ᨔᨙᨃ ᨀᨈᨚᨆᨗᨖ ᨅᨅᨊ ᨀᨈᨚᨑᨚᨕᨙ ᨕᨗᨄᨈᨘᨉ ᨕᨗᨐᨑᨚ ᨔᨅᨗᨊ ᨄᨛᨈ ᨕᨍᨗ ᨈᨚᨑᨙ, ᨕᨗᨐᨔᨛᨕᨙ ᨕᨑᨘ ᨅᨈᨘ ᨈᨚᨒᨗ ᨌᨙᨒᨙᨂᨗᨓᨗ ᨄᨘᨕᨊ ᨄᨛᨈ ᨕᨍᨗ ᨈᨚᨑᨙ ᨆᨅᨗᨌᨑ ᨕᨉᨗ ᨀᨅᨙᨌᨙ ᨀᨗ ᨔᨙᨃ᨞ ᨀᨛᨅᨛᨈᨘᨒ ᨕᨛᨃᨕᨛᨃ ᨓᨛᨈᨘ ᨊᨌᨙᨒᨙᨂᨗᨓᨗ ᨕᨑᨘ ᨅᨈᨘ ᨄᨘᨕᨊ ᨄᨛᨈ ᨕᨍᨗ ᨈᨚᨑᨙ ᨑᨗᨐᨔᨛ᨞ “ᨆᨆᨈ ᨐᨘᨊᨚᨕᨗ ᨄᨕᨀᨘ ᨄᨛᨈ ᨕᨍᨗ ᨈᨚᨑᨙ ᨄᨘᨃᨗ ᨕᨉᨗ ᨀᨅᨙᨌᨙ᨞ ᨈᨛᨄᨆᨛᨈᨙ ᨕᨄᨚᨕᨗ ᨊᨔᨛ᨞ “ᨕᨙ ᨄᨘᨕ ᨀᨅᨙᨌᨙ᨞ ᨆᨘᨊᨚ ᨅᨓᨆᨗᨈᨘ ᨄᨘᨕᨀᨘ ᨄᨛᨈ ᨕᨍᨗ ᨈᨚᨑᨙ, ᨄᨘᨑ ᨕᨘᨔᨅᨗ, ᨆᨊ ᨆᨙᨆᨛ ᨐᨈᨘ ᨁᨒᨘ ᨆᨚᨋᨚᨕᨙ ᨀᨗ ᨒᨚᨇᨚ ᨒᨙᨆᨚᨒᨙᨆᨚ ᨕᨗᨈᨛᨒᨕᨙ ᨒᨉᨘᨓ ᨕᨋᨙ ᨒᨗᨆᨒᨚᨕᨊ᨞ ᨆᨊ ᨄᨚᨒᨙ ᨀᨗ ᨊᨙᨊᨙᨊ ᨑᨗᨐᨚᨒᨚ ᨒᨛᨈᨘ ᨊᨄᨆᨊᨑᨛ ᨕᨊ ᨒᨛᨈᨘ ᨆᨀᨘᨀᨘᨕᨕᨙ᨞”
ᨕᨗᨐᨊᨑᨚ ᨓᨛᨈᨘᨕᨙ ᨆᨌᨕᨗ ᨕᨉᨗ ᨀᨅᨙᨌᨙ ᨊᨔᨛ᨞ “ᨆᨛᨈᨙᨔᨗ ᨀᨚᨑᨚ ᨔᨅᨗ ᨄᨒᨛᨔᨘᨕᨙ ᨈᨛᨋᨗ ᨈᨊᨕᨗ ᨊᨆᨛᨈᨙ᨞”
ᨊᨆᨙᨌᨘᨕᨗ ᨀᨔᨗ ᨕᨑᨘ ᨅᨈᨘ, ᨆᨌᨕᨗ ᨄᨛᨈ ᨕᨍᨗ ᨈᨚᨑᨙ ᨐᨆᨙᨌᨘᨗᨕᨗ ᨔᨅᨗᨊ, ᨆᨛᨉᨙ᨞ ᨓᨛᨈᨘᨊ ᨆᨛᨉᨙ, ᨉᨙ ᨊᨕᨘᨒᨙ ᨒᨚᨒᨚᨂᨛᨂᨗ᨞ ᨒᨚᨀᨔᨗᨖ ᨕᨉᨗ ᨀᨅᨙᨌᨙ ᨄᨉᨈᨚᨕᨗ ᨄᨉᨆᨀᨘᨋᨕᨗᨊ ᨐᨔᨛᨕᨙ ᨕᨗᨅᨛᨔᨙ᨞ ᨕᨗᨐᨊᨑᨚ ᨆᨒᨚᨒᨚ, ᨀᨚᨆᨚᨈᨚᨕᨗ ᨔᨙᨃ ᨆᨚᨋᨚ ᨊᨔᨛ᨞ “ᨆᨚᨀᨚᨀᨚ ᨉᨗ ᨅᨛᨔᨙᨕᨙ, ᨅᨒᨗᨀ ᨔᨄᨕᨗ ᨄᨛᨈ ᨕᨍᨗ ᨈᨚᨑᨙ ᨒᨚᨒᨚ ᨔᨅᨗ᨞” ᨆᨀᨛᨉᨕᨗ ᨕᨗᨅᨛᨔᨙ “ᨆᨁᨗ ᨊᨕᨗᨔᨄ?” ᨊᨔᨛ “ᨆᨀᨑᨀᨑᨀ ᨊᨉᨙᨄ ᨊᨄᨛᨈᨘ ᨀᨑᨀᨑᨀᨘ ᨊᨒᨑᨗ᨞ ᨍᨍᨗ ᨆᨒᨑᨗᨐ ᨅᨗᨌᨑ ᨕᨔᨛᨊ᨞”
ᨅᨒᨗᨀᨗ ᨔᨄᨕᨗ᨞ ᨕᨛᨋᨛᨆᨗ ᨕᨛᨃ ᨆᨘᨑᨘᨈᨘ ᨐᨆᨙᨆᨛᨂᨗ ᨆᨛᨒ, ᨅᨑᨊ ᨑᨘᨈᨘᨕᨗ ᨕᨗᨀᨚᨁᨗ ᨕᨐᨁᨗ, ᨈᨗᨀᨛ ᨒᨒᨚᨕᨗ ᨆᨘᨖᨘᨀᨘᨕᨗ᨞ “ᨆᨀᨘᨈᨔᨗ ᨕᨗᨅᨛᨔᨙ᨞ “ᨖᨘᨀᨘᨆ ᨕᨁ ᨄᨘᨕ ᨀᨅᨙᨌᨙ ᨕᨗᨐ ᨆᨑᨚ ᨕᨗᨑᨘᨈᨘ?” ᨆᨀᨛᨉᨕᨗ ᨕᨉᨗ ᨀᨅᨙᨌᨙ “ᨉᨘᨓᨆᨗ ᨅᨓ ᨉᨗ ᨖᨘᨀᨘᨆ ᨓᨛᨉᨗ ᨕᨗᨓᨙᨑᨙᨂᨗᨈᨘ᨞ ᨊᨑᨙᨀᨚ ᨈᨕᨘᨚ ᨆᨘᨄᨗ ᨆᨘᨑᨘᨈᨘᨕᨗ, ᨈᨗᨀᨛ ᨒᨒᨚᨕᨗ ᨆᨘᨒᨛᨆᨛᨕᨗ᨞ ᨊᨑᨙᨀᨚ ᨆᨈᨙᨊᨗ ᨁᨈᨘ ᨅᨓᨊᨗ ᨑᨗᨐ᨞ ᨕᨗᨐᨆᨗᨈᨘ ᨖᨘᨀᨘᨆ ᨓᨛᨉᨗ ᨕᨗᨓᨙᨑᨙᨂᨗ᨞”
