ᨕᨛᨃ ᨕᨊᨕᨊ ᨉᨘᨓ ᨆᨄᨉ ᨅᨘᨑᨊᨙ᨞ ᨕᨗᨐ ᨕᨊᨕᨊ ᨉᨘᨓᨕᨙ ᨆᨄᨉ ᨅᨘᨑᨊᨙ ᨅᨕᨗᨌᨘ ᨆᨘᨄᨗ ᨀᨔᨗ ᨀᨗᨑᨀᨗᨑ ᨕᨗᨐᨑᨚ ᨆᨌᨚᨕᨕᨙ ᨕᨘᨆᨘᨑᨘ ᨒᨗᨆ ᨈᨕᨘ ᨕᨗᨐᨑᨚ ᨆᨒᨚᨒᨚᨕᨙ ᨕᨘᨆᨘᨑᨘ ᨉᨘᨓ ᨈᨕᨘ᨞ ᨕᨗᨐ ᨕᨊ ᨉᨘᨓᨕᨙ ᨆᨄᨉ ᨅᨘᨑᨊᨙ ᨆᨄᨚᨑᨚ ᨕᨗᨉᨚᨕᨗ᨞ ᨕᨗᨐᨑᨚ ᨆᨄᨚᨑᨚ ᨕᨗᨉᨚᨊ ᨕᨀᨚᨆᨗ ᨕᨄᨚᨑᨚ ᨕᨗᨉᨚᨊ ᨆᨚᨋᨚ ᨀᨗ ᨕᨅᨚᨊ ᨑᨙᨀᨙ᨞
ᨕᨗᨐᨑᨚ ᨕᨅᨚᨊ ᨕᨗᨐᨆᨗ ᨄᨒᨄᨒᨕᨚᨊ ᨈᨚᨒᨗ ᨒᨕᨚ ᨆᨉᨑᨛᨉᨑᨛ᨞ ᨍᨍᨗ ᨊᨀᨙ ᨍᨚᨀᨕᨗ ᨀᨚ ᨕᨙᨒᨙᨕᨗ ᨕᨅᨚᨊ ᨕᨗᨐᨄᨗ ᨊᨒᨗᨔᨘ ᨀᨚ ᨈᨛᨂᨕᨛᨔᨚᨕᨗ᨞
ᨅᨗᨐᨔᨈᨚᨑᨚ ᨆᨉᨚᨀᨚ ᨕᨗᨊᨋᨙ ᨆᨓᨙᨊᨗ ᨕᨗᨐᨄ ᨊᨒᨗᨔᨘ ᨀᨚ ᨒᨅᨘ ᨕᨛᨔᨚᨕᨙ᨞ ᨍᨍᨗ ᨕᨗᨐᨑᨚ ᨕᨊᨕᨊ ᨅᨙᨌᨘᨕᨙ ᨀᨚᨊᨗ ᨄᨚᨑᨚ ᨕᨗᨉᨚᨊ ᨆᨚᨋᨚ᨞ ᨕᨗᨐ ᨄᨚᨑᨚ ᨕᨗᨉᨚᨊ ᨆᨒᨉᨛ ᨊᨌᨌ ᨄᨚᨑᨚ ᨕᨊ ᨊ᨞ ᨕᨗᨐᨑᨚ ᨒᨉᨛᨊ ᨊᨌᨌ ᨊᨀᨚ ᨉᨙᨕᨗ ᨁᨁ ᨕᨅᨚᨊ ᨉᨙ ᨊᨄᨋᨙᨕᨗ᨞ ᨆᨉᨛᨑᨗᨈᨚ ᨊᨀᨚ ᨔᨗᨕᨛᨔᨚᨕᨗ ᨕᨅᨚᨊ ᨆᨚᨋᨚ ᨀᨗ ᨄᨒᨕᨚᨊ ᨔᨗᨕᨛᨔᨚᨈᨚ ᨕᨊᨕᨊᨕᨙ ᨈᨛᨆᨋᨙ ᨈᨛᨆᨗᨊᨘ᨞ ᨕᨁ ᨕᨀᨒᨛᨊ ᨕᨗᨐ ᨄᨚᨑᨚ ᨕᨗᨉᨚᨊ ᨕᨚᨋᨚ ᨍᨊ ᨕᨀᨒᨛᨊ ᨊᨑᨙᨀᨚ ᨕᨛᨃᨊᨗ ᨊᨈᨗᨑᨚ ᨆᨑᨚ ᨕᨅᨚᨊ ᨒᨗᨔᨘ ᨈᨛᨄ ᨆᨄᨑᨗᨄᨑᨗᨊᨗᨈᨘ ᨑᨙᨋᨙ ᨕᨗᨐᨑᨚ ᨕᨊᨕᨊ ᨉᨘᨓᨕᨙ ᨒᨕᨚ ᨑᨗ ᨅᨚᨒ ᨕᨊᨔᨘᨕᨙ ᨆᨒ ᨕᨗᨊᨋᨙ ᨊᨔᨘᨔᨘᨕᨗᨂᨛ ᨆᨊᨛᨕᨗ ᨑᨘᨄᨊ ᨄᨚᨑᨚ ᨕᨊᨊ᨞ ᨍᨍᨗ ᨊᨑᨙᨀᨚ ᨕᨛᨃᨊᨗ ᨕᨅᨚᨊ᨞ ᨆᨕᨙᨒᨚᨊᨗ ᨕᨗᨄᨋᨙ ᨕᨅᨚᨊ᨞ ᨕᨗᨐᨑᨚ ᨒᨄᨚ ᨕᨊᨕᨊ ᨊᨔᨅ ᨅᨕᨗᨌᨘ ᨆᨘᨄ᨞ ᨊᨑᨙᨀᨚ ᨆᨕᨙᨒᨚᨊᨗ ᨆᨋᨙ ᨕᨅᨚᨊ ᨄᨉ ᨒᨕᨚᨊᨗ ᨆᨉᨛᨄᨙ᨞ ᨆᨕᨙᨒᨚᨈᨚᨊᨗ ᨀᨔᨗ ᨄᨉ ᨆᨋᨙ ᨊᨔᨅ ᨆᨒᨘᨄᨘᨕᨗ᨞
ᨍᨍᨗ ᨆᨀᨘᨈᨊᨊᨗ ᨕᨅᨚᨊ ᨆᨀᨉ “ᨄᨘᨑᨆᨚᨁᨗ ᨆᨋᨙ ᨕᨐᨕᨙ?” ᨆᨀᨙᨉᨕᨗ “ᨉᨙᨔᨈᨘ ᨄᨍᨊ ᨈᨚᨒᨗ ᨆᨋᨙ᨞ ᨈᨚᨒᨗ ᨅᨚᨒ ᨕᨊᨔᨘᨕᨙ ᨆᨗ ᨑᨋᨛ᨞ ᨕᨗᨈᨔᨕᨗ ᨕᨛᨃ ᨆᨘᨄᨗ ᨕᨗᨊᨋᨙ ᨆᨍᨄᨘᨍᨄᨘ ᨀᨗ ᨑᨘᨄᨊ᨞”
ᨍᨗᨍ ᨈᨚᨒᨗ ᨆᨀᨘᨊᨗᨑᨚ ᨀᨔᨗ ᨕᨛᨔᨚᨕᨛᨔᨚ ᨕᨗᨐᨑᨚ ᨕᨊᨕᨊᨕᨙ᨞ ᨅᨗᨐᨔᨈᨚ ᨑᨚ ᨀᨚ ᨆᨋᨙᨕᨗ ᨕᨅᨚᨊ ᨆᨀᨚᨑᨚ ᨀᨚᨈᨚᨒᨗ ᨕᨛᨃ ᨆᨉᨛᨄᨙ ᨆᨉᨛᨂᨗ ᨕᨗᨄᨋᨙᨔᨗ ᨀᨗ ᨕᨅᨚᨊ᨞
ᨁᨃᨊ ᨕᨗᨐᨑᨚ ᨕᨊᨕᨊᨕᨙ ᨄᨙᨊᨙ ᨒᨕᨚ ᨕᨛᨔᨚ ᨄᨙᨊᨙ ᨆᨑᨍᨑᨍ ᨈᨚᨊᨗ᨞ ᨊᨑ ᨄᨉ ᨆᨌᨊᨗ ᨆᨌᨘᨒᨙᨌᨘᨒᨙ ᨀᨗ ᨐᨚᨒᨚ ᨅᨚᨒᨕᨙ ᨈᨚᨒᨗ ᨔᨗᨑᨙᨇᨛᨑᨛᨇᨛ ᨑᨁ᨞ ᨆᨈᨛᨑᨘ ᨆᨊᨗᨖ ᨆᨙᨋᨙ ᨅᨚᨒ ᨆᨈᨛᨑᨘ ᨈᨛᨄ ᨀᨗ ᨈᨛᨊᨘᨊ ᨕᨗᨐᨕᨙ ᨄᨚᨑᨚ ᨕᨗᨉᨚᨊ᨞ ᨕᨗᨐᨑᨚ ᨄᨚᨑᨚ ᨕᨗᨉᨚᨊ ᨕᨔᨛᨊ ᨕᨗᨊᨁ ᨕᨘᨒᨛ ᨉᨕᨙ ᨔᨗᨈᨄ᨞ ᨈᨛᨄᨊ ᨑᨁᨕᨙ ᨀᨗ ᨈᨛᨊᨘᨊ ᨄᨚᨑᨚ ᨕᨗᨉᨚᨊ ᨆᨍᨒᨚ᨞ ᨕᨋᨚ ᨌᨕᨗᨊ ᨕᨗᨐᨄ ᨊᨆᨎᨆᨛ ᨎᨓᨊ ᨊᨀᨚ ᨊᨋᨙᨕᨗ ᨕᨈᨙᨊ ᨕᨗᨐᨑᨚ ᨕᨊᨕᨊᨕᨙ᨞ ᨈᨚᨒᨗ ᨄᨘᨑᨊ ᨕᨗᨒᨚᨊᨗᨁᨃ ᨕᨛᨃ ᨕᨅᨚᨊ ᨕᨗᨐᨑᨚ ᨕᨊᨕᨊᨕᨙ ᨒᨗᨔᨘ᨞ ᨊ ᨕᨗᨐᨑᨚ ᨄᨘᨑᨊ ᨊᨌᨑᨗᨈ ᨆᨀᨛᨉ ᨆᨍ ᨅᨘᨑᨊᨙᨓᨙ ᨊᨀᨚ ᨆᨀᨘᨋᨕᨗᨊ ᨌᨚᨒᨚᨓᨚᨕᨗ ᨆᨔᨗᨈ ᨈᨛᨋᨄᨙ ᨕᨀᨒᨛᨊ᨞ ᨁᨃᨊ ᨀᨛᨄᨘᨈᨘᨔᨊ ᨊᨒᨛᨅᨗᨑᨛ ᨅᨙᨊᨙᨊ ᨊ ᨕᨊᨐᨚᨒᨚᨊ᨞ ᨁᨃ ᨊᨈᨘᨑᨘᨔᨗ᨞ ᨕᨗᨐᨈᨚᨔᨗ ᨕᨅᨚᨊ ᨊᨔᨅ ᨉᨙ ᨊᨒᨛᨆᨘ ᨎᨓᨊ ᨆᨗᨈᨕᨗ ᨕᨀᨚᨑᨚ ᨀᨗ ᨅᨚᨒᨕᨙ ᨐᨘᨊᨘ ᨕᨊᨊ ᨊᨕᨗᨐᨒ ᨕᨈᨙᨊ᨞ ᨈᨛᨄᨔ ᨊᨚᨒᨗᨕᨗ ᨅᨒᨗ ᨅᨚᨒᨊ᨞ ᨕᨗᨐᨊᨑᨚ ᨅᨒᨗ ᨅᨚᨒᨊ ᨆᨀᨛᨉ “ᨆᨉᨙᨌᨙᨕᨗ ᨕᨗᨐᨄ ᨇᨘᨊᨚᨕᨗ ᨕᨗᨐᨈᨘ ᨕᨊᨕᨊᨕᨙ᨞ ᨕᨗᨐᨄ ᨈᨗᨓᨗᨕᨗ ᨒᨕᨚ ᨑᨗ ᨕᨒᨛᨕᨙ ᨊᨀᨚᨑᨚ ᨕᨘᨓᨘᨊᨚ ᨕᨘᨄᨚᨒᨙᨐᨂᨛᨀᨚ ᨕᨈᨙᨊ᨞”
ᨕᨁ ᨕᨗᨐᨒᨊᨗ ᨕᨗᨐᨑᨚ ᨕᨊᨕᨊᨕᨙ ᨀᨗ ᨅᨒᨗ ᨅᨚᨒᨊ ᨊᨈᨗᨓᨗ ᨀᨗ ᨓᨗᨑᨗ ᨀᨒᨛᨕᨙ᨞ ᨊᨒᨛᨈᨘᨊ ᨑᨗ ᨓᨗᨑᨗ ᨀᨒᨛᨕᨙ ᨁᨗᨒᨗᨊᨗ ᨕᨗᨐᨑᨚ ᨈᨕᨘ ᨆᨕᨙᨒᨚᨕᨙ ᨒᨕᨚ ᨇᨘᨊᨚᨕᨗ᨞ ᨊᨆᨛᨔᨙ ᨒᨉᨛ ᨅᨅᨘᨕᨊ ᨆᨗᨈᨕᨗ ᨕᨗᨐᨕᨙ ᨒᨄᨚ ᨕᨊᨕᨊᨕᨙ᨞ ᨈᨛᨄᨔ ᨈᨗᨀᨛᨕᨗ ᨔᨙᨉᨗ ᨕᨚᨒᨚᨀᨚᨒᨚᨊ ᨕᨗᨐᨑᨚ ᨕᨚᨒᨚᨀᨚᨒᨚᨕᨙ ᨊᨒ ᨕᨈᨙᨊ᨞
ᨊᨄ ᨊᨄᨉ ᨕᨗᨐᨑᨚ ᨕᨊᨕᨊᨕᨙ ᨆᨀᨛᨉ “ᨆᨀᨘᨀᨘᨕᨕᨙ ᨕᨗᨀᨚ ᨕᨍᨊ ᨆᨘᨒᨙᨔᨘ ᨒᨕᨚ ᨀᨚᨑᨚ ᨓᨊᨘᨕᨕᨙ ᨕᨅᨗᨐᨊᨗ ᨕᨒᨙᨆᨘ᨞”
ᨍᨍᨗ ᨄᨘᨑᨊ ᨊᨄᨉ ᨕᨊᨀᨘᨕᨕᨙᨑᨚ᨞ ᨊᨒᨊᨗ ᨕᨈᨙᨊ ᨕᨗᨐᨑᨚ ᨕᨚᨒᨚᨀᨚᨒᨚᨕᨙ ᨊᨄᨒᨙᨔᨘᨂᨛ ᨕᨗ ᨄᨚᨑ ᨕᨗᨉᨚᨊ ᨊᨔᨅ ᨉᨙᨊᨗ ᨁᨁ ᨄᨚᨑᨚ ᨕᨊᨊ ᨀᨗ ᨒᨒᨛᨇᨚᨒ᨞ ᨅᨛᨈᨘᨕᨊ ᨕᨒᨙᨊᨆᨊᨗ ᨆᨗᨔᨛᨕᨗ ᨔᨗᨊᨗᨊ ᨕᨊᨘᨊ ᨒᨀᨕᨗᨊ᨞ ᨄᨚᨒᨛᨕᨊ ᨒᨀᨕᨗᨊ᨞
ᨕᨁ ᨕᨗᨐᨕᨙ ᨕᨊ ᨉᨘᨕᨕᨙ ᨆᨄᨉ ᨅᨘᨑᨊᨙ ᨍᨚᨀᨊᨗ ᨔᨗᨍᨚᨀᨍᨚᨀᨊ ᨄᨗᨈᨘ ᨈᨊᨙᨈᨙ ᨒᨇᨙ ᨊᨒᨗᨓᨛ ᨊᨒᨗᨓᨛᨈᨚᨄ᨞ ᨁᨃ ᨊᨑᨈᨙᨊᨗ ᨔᨙᨉᨗᨕᨙ ᨕᨒᨙ᨞ ᨈᨆᨊᨗ ᨀᨚᨑᨚ ᨀᨗ ᨕᨒᨛᨕᨙ᨞ ᨀᨗᨑᨀᨗᨑ ᨔᨗᨈᨛᨂ ᨕᨛᨔᨚ ᨁᨃ ᨊᨈᨆᨕᨗᨊ ᨕᨗᨐᨑᨚ ᨕᨒᨛᨕᨙ᨞ ᨈᨛᨄ ᨊᨑᨘᨈᨘᨊᨗ ᨔᨙᨉᨗ ᨅᨚᨒ ᨀᨚᨑᨚ ᨀᨗ ᨈᨛᨂᨊ ᨕᨒᨛ ᨈᨛᨋᨗ ᨓᨛᨈᨘᨇᨛᨈᨘᨕᨙ᨞ ᨕᨁ ᨕᨗᨐᨕᨙ ᨕᨊᨕᨊ ᨉᨘᨓᨕᨙ ᨆᨀᨛᨉᨕᨗ ᨕᨈᨗᨊ ᨕᨗᨒᨒᨛ “ᨈᨚᨆᨋᨙᨓ ᨕᨗᨐᨕᨙ᨞”
ᨊᨄᨉᨊᨗ ᨕᨋᨗᨊ ᨆᨀᨛᨉ “ᨈᨚᨒᨙᨄᨊ ᨋᨗ ᨀᨘᨕᨕᨙ ᨆᨒᨕᨘ ᨕᨗᨊᨋᨙ᨞”
ᨕᨁ ᨊᨄᨚᨒᨙᨕᨗ ᨕᨗᨐᨑᨚ ᨅᨚᨒᨕᨙ ᨉᨙ ᨁᨁ ᨈᨂᨛᨊ᨞ ᨆᨂᨚᨕᨂᨚᨕ ᨅᨓᨆᨗ ᨍᨍᨗ ᨆᨈᨛᨑᨘ ᨈᨆ᨞ ᨉᨙᨁᨁ ᨈᨕᨘ ᨊᨄᨚᨒᨙᨕᨗ ᨅᨊᨆᨗ ᨒᨗᨔᨛᨊ ᨕᨗᨐᨑᨚ ᨅᨚᨒᨕᨙ ᨑᨚᨈᨆᨗ᨞ ᨉᨙ ᨊᨈᨀᨈᨚᨑᨚ ᨒᨗᨔᨛᨊ᨞ ᨕᨛᨃ ᨆᨊᨛᨊᨗ ᨅᨘᨀᨘ-ᨅᨘᨀᨘᨕᨙ ᨀᨚᨑᨚ ᨈᨈᨒᨛ-ᨈᨒᨛ᨞ ᨔᨅᨊ ᨕᨛᨃ ᨕᨁ ᨅᨘᨀᨘ ᨄᨚᨄ ᨈᨙᨉᨚ᨞ ᨅᨘᨀᨘ ᨅᨙᨅᨙ᨞ ᨄᨚᨀᨚᨊ ᨆᨙᨁ ᨑᨘᨄ-ᨑᨘᨄᨊ ᨅᨘᨀᨘ-ᨅᨘᨀᨘ ᨀᨚᨑᨚ᨞ ᨊᨕᨙᨀᨗᨐ ᨕᨗᨒᨒᨛᨊ ᨕᨗᨐᨑᨚ ᨅᨚᨒᨕᨙ ᨕᨛᨃᨆᨘᨕ ᨅᨛᨑᨛ ᨕᨁ᨞ ᨔᨀᨛ-ᨔᨀᨛᨔ ᨕᨋᨙᨕᨙ ᨒᨗᨔᨛᨊ᨞ ᨈᨛᨄᨔ ᨊᨔᨅ ᨆᨒᨘᨄᨘ ᨒᨉᨛᨊᨗ ᨕᨗᨐᨕᨙ ᨕᨊᨕᨊᨕᨙ ᨀᨔᨗᨊ᨞ ᨈᨚᨒᨗ ᨆᨎᨗᨒᨗᨊᨗ ᨔᨄᨕᨗ ᨄᨘᨊ ᨅᨚᨒᨕᨙ ᨒᨚ ᨆᨙᨒᨕᨘᨕᨗ ᨓᨛᨉᨗᨕᨙ ᨊᨋᨙ ᨊ ᨉᨙᨁᨁ᨞ ᨈᨛᨄᨔ ᨊᨒ ᨅᨓᨆᨊᨗ ᨊᨋᨙᨕᨗ᨞ ᨕᨁ ᨄᨘᨑᨕᨗ ᨆᨋᨙ᨞ ᨈᨘᨉᨊᨗ ᨀᨔᨗ ᨔᨗᨂᨚᨒᨚᨂᨚᨒᨚ ᨕᨋᨗᨊ᨞ ᨉᨙ ᨊᨆᨕᨗᨈ ᨈᨛᨄ ᨕᨛᨃ ᨆᨊᨖ ᨔᨉ ᨊᨕᨙᨃᨒᨗᨂ ᨄᨉ ᨁᨘᨈᨘ ᨄᨑᨛᨄᨕᨙ᨞
ᨆᨀᨙᨉ “ ᨕᨛᨃ ᨆᨅᨕᨘ ᨈᨚ ᨒᨗᨊᨚ ᨕᨛᨃᨑᨚ ᨅᨕᨘ ᨈᨚᨒᨗᨊᨚ!”
ᨍᨍᨗ ᨊᨔᨉᨑᨗ ᨕᨗᨐᨕᨙ ᨕᨊᨕᨊᨕᨙ ᨆᨀᨛᨉ᨞ ᨅᨑ ᨅᨚᨒᨊ ᨕᨗᨐᨕᨙ ᨊᨙᨊᨙ ᨄᨀᨉᨙ᨞
ᨕᨐᨔᨛ ᨊᨙᨊᨙ ᨄᨀᨉᨙ ᨊᨔᨅ ᨆᨒᨚᨄᨚ᨞ ᨄᨀᨋᨙ ᨈᨕᨘ᨞ ᨊᨑᨙᨀᨚ ᨈᨙᨉᨚ ᨈᨄ ᨊᨈᨘᨊᨘ ᨅᨓᨆᨗ ᨊᨋᨙᨕᨗ᨞ ᨕᨚᨒᨚᨀᨚᨒᨚ ᨒᨕᨗᨕᨙ ᨆᨀᨚᨈᨚᨑᨚ ᨈᨄ ᨊᨈᨘᨊᨘ ᨅᨓᨆᨗ ᨊᨋᨙᨕᨗ᨞ ᨐᨀᨚ ᨈᨕᨘ ᨆᨉᨛᨑᨗ ᨊᨋᨙ ᨆᨆᨈᨆᨗ ᨕᨁ᨞ ᨍᨍᨗ ᨕᨗᨈᨛᨒᨕᨗ ᨊᨙᨊᨙ ᨄᨀᨉᨙ᨞
ᨕᨁ ᨕᨗᨐ ᨊᨙᨋᨙ ᨈᨚᨂᨛᨊ ᨅᨚᨒ᨞ ᨈᨛᨄ ᨆᨀᨛᨉᨊᨗ ᨊᨙᨊᨙ ᨄᨀᨉᨙ “ᨊᨗᨁᨈᨘ ᨕᨗᨀᨚ ᨀᨄᨚᨀᨄᨚ?᨞
ᨊᨔᨛ “ᨕᨗᨐᨊ ᨈᨕᨘ ᨉᨙᨁᨁ ᨕᨗᨉᨚᨀᨘ᨞ ᨊᨕᨙᨀᨗᨐ ᨕᨅᨚᨀᨘ ᨆᨅᨙᨊᨙᨊᨗ᨞ ᨈᨛᨄᨔ ᨓᨛᨅᨗᨐᨊᨗ ᨕᨒᨙᨀᨘ᨞ ᨕᨗᨐᨊ ᨕᨘᨒᨛᨈᨘ ᨀᨘᨕᨕᨙ ᨀᨗ ᨅᨚᨒᨕᨙᨓᨙ᨞”
ᨍᨍᨗ ᨆᨀᨙᨉᨕᨗ ᨊᨙᨊᨙ ᨄᨀᨉᨙ “ᨆᨉᨙᨌᨙᨊᨗ ᨕᨚᨋᨚᨊᨚ ᨀᨘᨈᨘ ᨀᨄᨚ-ᨀᨄᨚ᨞ ᨆᨚᨋᨚ-ᨕᨚᨋᨚᨂᨗ ᨅᨚᨒᨕᨙ᨞ ᨕᨛᨃᨈᨘ ᨕᨁᨁᨕᨙ ᨉᨙᨀᨚᨕᨙᨁ ᨕᨗᨒᨒᨛ ᨄᨚᨒ᨞ ᨆᨙᨁ ᨓᨑᨇᨑ᨞ ᨍᨍᨗ ᨌᨚᨌᨚᨊᨗ ᨈᨘ ᨕᨚᨋᨚᨊᨚ ᨀᨘᨈᨘ ᨆᨂᨚᨋ ᨅᨚᨒ ᨊᨀᨚ ᨒᨚᨀᨊ ᨕᨗᨐ ᨕᨗᨍᨚᨀᨀᨘ᨞ ᨄᨘᨑᨊᨚ ᨆᨋᨙ ᨀᨄᨚ-ᨀᨄᨚ?”
ᨆᨀᨛᨉᨕᨗ “ᨄᨘᨑᨀ”
ᨆᨀᨛᨉᨕᨗ “ᨈᨚᨒᨗ ᨕᨋᨙᨕᨋᨙᨀᨚ ᨅᨑ ᨆᨔᨗᨁᨀᨚ ᨆᨒᨚᨄᨚ᨞”
ᨆᨀᨙᨉᨕᨗ “ᨆᨁᨊᨗ ᨀᨈᨙᨀᨈᨙᨆᨘ ᨀᨄᨚ᨞”
ᨊᨔᨛ “ᨊᨄᨕᨗ ᨄᨉ ᨅᨛᨊᨗ ᨅᨛᨑᨛ᨞”
ᨊᨔᨛ “ᨕᨋᨙᨕᨋᨙᨀᨚ ᨅᨑ ᨆᨔᨗᨁᨀᨚ ᨆᨒᨚᨄᨚ᨞”
ᨍᨍᨗ ᨕᨗᨐᨊᨑᨚ ᨊᨈᨘᨃ ᨕᨛᨔᨚᨕᨛᨔᨚ ᨆᨂᨚᨋ ᨅᨚᨒ ᨊᨔᨅ ᨀᨚ ᨕᨙᨒᨙᨕᨗ ᨍᨚᨀᨊᨗ ᨊᨙᨊᨙ ᨄᨀᨉᨙ᨞ ᨕᨑᨓᨙᨄᨗ ᨊᨒᨗᨔᨘ᨞ ᨅᨗᨐᨔᨈᨚᨑᨚ ᨄᨚᨒᨙᨕ ᨍᨚᨂ᨞ ᨅᨗᨐᨔᨈᨚ ᨅᨓᨗ᨞ ᨅᨗᨐᨔᨈᨚ ᨕᨚᨒᨚᨀᨚᨒᨚ ᨊᨈᨗᨀᨛ ᨊᨙᨊᨙ ᨄᨀᨉᨙ ᨊᨋᨙᨕᨗ᨞ ᨈᨚᨒᨗ ᨕᨗᨐᨊᨑᨚ ᨊᨈᨘᨃ ᨁᨃᨊ ᨕᨗᨐ ᨕᨊᨕᨊᨕᨙ ᨊᨕᨗᨔᨛ-ᨕᨗᨔᨛᨈᨚᨊᨗᨖ ᨅᨈᨘᨕ ᨊᨔᨅ ᨆᨑᨍ-ᨑᨍᨊᨗ᨞
ᨆᨀᨛᨉᨔᨗ ᨊᨙᨊᨙ ᨄᨀᨉᨙ “ᨆᨁᨊᨗ ᨈᨘ ᨀᨈᨙᨀᨈᨙᨆᨘ ᨀᨄᨚ?”
ᨆᨀᨛᨉᨕᨚ “ᨊᨄᨕᨗ ᨄᨉ ᨈᨛᨒᨚ ᨕᨗᨈᨗ᨞”
ᨆᨀᨛᨉᨔᨗ ᨊᨙᨊᨙ ᨄᨀᨉᨙ “ ᨕᨋᨙᨕᨋᨙᨀᨚ”
ᨍᨍᨗ ᨕᨗᨐᨑᨚ ᨕᨋᨙᨊ ᨒᨄᨚ ᨕᨊᨊ ᨉᨙᨊ ᨊᨔᨑᨕᨗ ᨊᨔᨅ ᨊᨙᨊᨙ ᨄᨀᨉᨙ ᨆᨊᨗ ᨔᨄᨑᨛ ᨕᨗ᨞
ᨕᨗᨔᨗᨈᨀᨗᨊᨗ ᨌᨑᨗᨈᨕᨙ᨞ ᨆᨑᨍᨊᨗ ᨕᨗᨐᨑᨚ ᨕᨊᨊᨕᨙ᨞ ᨊᨗᨔᨛᨊᨗ ᨆᨄᨖᨕᨙ᨞ ᨅᨗᨐᨔᨈᨚᨊᨗ ᨊᨄᨛᨖᨈᨗᨀ ᨀᨙᨕᨉᨕᨊ ᨊᨙᨊᨙᨊ ᨑᨚ᨞ ᨅᨗᨐᨔ ᨊᨙᨊᨙ ᨄᨀᨉᨙ ᨕᨛᨃ ᨅᨚᨈᨚᨒᨚ ᨊᨁᨈᨘ ᨀᨘ ᨅᨚᨑᨗ ᨑᨀᨙᨐᨕᨙ᨞ ᨍᨍᨗ ᨆᨀᨘᨈᨊᨕᨗ ᨕᨗᨐᨑᨚ ᨕᨊᨊᨕᨙ ᨆᨀᨛᨉ “ᨕᨁ ᨒᨔᨛᨊ ᨕᨗᨐᨑᨚ ᨅᨚᨈᨚᨒᨚ ᨆᨘᨁᨈᨘᨁᨈᨘᨕᨙ?”
ᨆᨀᨛᨉᨕᨗ “ᨕᨍ ᨒᨒᨚ ᨆᨘᨀᨑᨓᨀᨑᨓᨕᨗ ᨊᨔᨅ ᨕᨗᨐᨊᨈᨘ ᨕᨚᨋᨚ ᨎᨓᨀᨘ᨞ ᨅᨗᨐᨔ ᨀᨚ ᨒᨚᨀᨀ ᨍᨚᨀ᨞ ᨅᨗᨐᨔ ᨕᨘᨈᨑᨚ ᨅᨓᨊᨗ ᨎᨓᨀᨘ ᨀᨚ ᨈᨘ ᨅᨚᨈᨚᨒᨚᨕᨙ ᨕᨘᨍᨚᨀ᨞ ᨍᨍᨗ ᨆᨚ ᨕᨁ ᨊᨁᨕᨘᨀᨛᨀ ᨈᨕᨘᨕᨙ ᨀᨚ ᨑᨉᨚ ᨕᨗᨐᨑᨙᨁ ᨔᨗᨑᨘᨈᨘᨀ ᨆᨌᨕᨙ᨞ ᨕᨁᨕᨙ ᨕᨘᨔᨗᨒᨚᨈᨙ ᨆᨕᨘ ᨆᨁ ᨒᨚᨀᨘ ᨉᨙ ᨈᨚ ᨕᨘᨆᨈᨙ᨞ ᨍᨍᨗ ᨕᨗᨐᨑᨚ ᨕᨚᨋᨚ ᨎᨓᨀᨘ᨞”
ᨕᨗᨐ ᨕᨊᨊᨕᨙ ᨊᨒᨚᨒᨚᨂᨛᨊᨗ ᨑᨖᨔᨗᨐᨊ ᨊᨙᨊᨙ ᨄᨀᨉᨙ᨞ ᨆᨀᨙᨉᨕᨗ “ᨕᨄᨊᨕᨘᨄᨊ ᨊᨗᨐᨄᨘ ᨕᨗᨐᨑᨚ ᨅᨚᨈᨚᨒᨚᨕᨙ᨞ ᨆᨍᨛᨄᨘ ᨆᨈᨙᨕᨗ ᨊᨙᨊᨙ ᨄᨀᨉᨙ ᨊᨔᨅ ᨀᨚᨕᨗᨑᨚ ᨆᨚᨋᨚ ᨎᨓᨊ᨞”
ᨍᨍᨗ ᨕᨛᨃᨊ ᨊᨕᨛᨃ ᨔᨗᨓᨛᨈᨘ᨞ ᨓᨛᨈᨘᨊ ᨆᨑᨍᨊᨗ ᨕᨗᨐᨑᨚ ᨕᨊᨊᨕᨙ ᨕᨗᨈᨊᨕᨗ ᨆᨀᨛᨉ “ᨆᨁᨊᨗ ᨀᨈᨙᨀᨈᨙᨆᨘ?”
ᨆᨀᨛᨉᨕᨗ “ᨄᨉᨊᨗ ᨒᨇᨒᨇᨕᨙ”
“ᨕᨋᨙᨕᨋᨙᨀᨚ ᨅᨑ ᨆᨑᨍ ᨒᨉᨛᨀᨚ!” ᨊᨄᨕᨘ ᨊᨙᨊᨙ ᨄᨀᨉᨙ᨞
ᨈᨚᨒᨗ ᨆᨄᨀᨚᨊᨗᨑᨚ ᨊᨑᨄᨗ ᨆᨑᨍ ᨒᨉᨛᨊᨗ ᨕᨗᨐᨕᨙ ᨕᨊᨊᨕᨙ᨞ ᨀᨒᨚᨒᨚᨊᨗ ᨉᨘᨕ ᨆᨄᨉ ᨅᨘᨑᨊᨙ᨞
ᨆᨀᨛᨉᨊᨗ ᨊᨙᨊᨙ ᨄᨀᨉᨙ “ᨆᨁᨊᨗ ᨀᨈᨙᨀᨈᨙᨆᨘ ᨀᨄᨚ?”
ᨆᨀᨙᨉᨕᨗ ᨕᨊ ᨉᨘᨕᨕᨙ “ᨆᨒᨚᨄᨚᨊᨗ ᨊᨙᨊᨙ ᨓᨛᨉᨗᨊᨗ ᨆᨘᨕᨋᨙ᨞”
ᨍᨍᨗ ᨆᨑᨗᨕᨚᨊᨗ ᨊᨙᨊᨙ ᨄᨀᨉᨙ᨞ ᨊᨄᨊᨗ ᨆᨀᨙᨉ “ᨕᨗᨐ ᨅᨍ ᨊᨀᨚ ᨕᨙᨒᨙᨕᨗ ᨔᨘᨅᨘᨔᨘᨅᨘᨀᨚ ᨆᨚᨈᨚ᨞ ᨆᨘᨕᨔᨚᨀᨚ ᨄᨘᨒᨘ ᨅᨚᨒᨚ᨞ ᨄᨆᨙᨁᨕᨗ ᨆᨘᨕᨋᨙ ᨁᨃ ᨆᨛᨔᨚᨆᨘ᨞ ᨔᨗᨊᨗᨊ ᨆᨘᨔᨙᨔᨕᨙ ᨈᨑᨚᨂᨛ ᨆᨊᨛᨆᨘᨕᨀ ᨔᨅ ᨒᨚᨀᨕ ᨒᨕᨚ ᨑᨗ ᨓᨗᨑᨗ ᨀᨒᨛᨕᨙ᨞”
ᨕᨗᨈᨚᨊ ᨕᨗᨐ ᨕᨊᨊᨕᨙ ᨊᨄᨖᨊᨗ ᨆᨀᨛᨉ᨞ ᨆᨕᨙᨒᨚᨊᨗ ᨊᨙᨊᨙ ᨄᨀᨉᨙ ᨆᨋᨙᨀᨗ ᨅᨍ᨞ ᨁᨃ ᨊᨄᨚᨉᨊᨗ ᨊᨙᨊᨙ ᨄᨀᨉᨙ ᨆᨀᨛᨉ “ᨒᨕᨚᨊᨗ ᨆᨈᨗᨋᨚᨈᨗᨋᨚ ᨕᨍ ᨊᨒᨒᨛᨄ ᨓᨛᨊᨗᨕᨙ ᨆᨘᨕᨈᨗᨋᨚ ᨊᨔᨅ ᨕᨙᨒᨚᨀᨗ ᨈᨘ ᨍᨚᨀ ᨅᨍ᨞”
ᨆᨀᨙᨉᨕᨗ ᨊᨙᨊᨙ ᨄᨀᨉᨙ “ᨕᨗᨐᨙ ᨒᨚᨀᨈᨚᨊᨚ ᨕᨗᨀᨚ ᨆᨕᨈᨗᨋᨚ᨞”
ᨕᨗᨐᨑᨚ ᨕᨊᨊ ᨉᨘᨕᨕᨙ ᨔᨗᨄᨚᨂᨛᨊ ᨊᨕᨗᨔᨛ ᨆᨀᨛᨉ ᨆᨕᨙᨒᨚᨊᨗ ᨕᨗᨐᨋᨙ ᨅᨍ᨞ ᨉᨙ ᨊᨕᨙᨒᨚ ᨆᨈᨗᨋᨚ ᨆᨈᨊ᨞ ᨁᨃ ᨆᨒᨒᨛ ᨓᨛᨊᨗᨕᨙ ᨊᨕᨙᨃᨒᨗᨂᨕᨗ ᨊᨙᨊᨙ ᨄᨀᨉᨙ ᨆᨂᨚᨑᨚ᨞ ᨆᨂᨚᨑᨚ ᨄᨉ ᨁᨘᨈᨘ ᨕᨙ᨞ ᨄᨄᨉ ᨔᨚᨒᨚᨕᨙ᨞ ᨆᨀᨚᨈᨘ ᨊᨙᨊᨙ ᨄᨀᨉᨙ ᨊᨀᨚ ᨆᨈᨗᨋᨚᨕᨗ᨞ ᨁᨃ ᨔᨘᨅᨘᨊᨗ᨞ ᨉᨙ ᨊᨕᨛᨃ ᨊᨈᨗᨋᨚ ᨆᨈᨊ ᨕᨗᨐᨑᨚ ᨕᨊᨊᨕᨙ᨞
ᨆᨕᨙᨒᨙᨊᨗ ᨍᨚᨀ ᨊᨙᨊᨙ ᨄᨀᨉᨙ ᨒᨕᨚ ᨆᨔ ᨕᨗᨔᨗᨊ ᨀᨗ ᨄᨚ ᨕᨓᨚᨕᨙ᨞ ᨊᨔᨅ ᨕᨗᨐᨑᨚ ᨕᨗᨔᨗᨊ ᨊᨙᨊᨙ ᨄᨀᨉᨙ᨞ ᨀᨚᨆᨗ ᨄᨚᨊ ᨕᨓᨚᨕᨙ ᨊᨔ ᨊᨕᨙᨒᨚᨑᨛ ᨆᨈᨑᨛ᨞ ᨊᨔᨅ ᨊᨀᨚ ᨈᨕᨘ ᨊᨋᨙ ᨉᨙ ᨊᨈᨘᨊᨘᨕᨗ ᨕᨁ᨞ ᨈᨛᨄ ᨊᨁᨑᨛᨄᨘᨆᨗ ᨊᨀᨙᨀᨙᨕᨗ ᨍᨍᨗ ᨆᨈᨑᨛᨄ ᨕᨗᨔᨗᨊ᨞ ᨕᨁ ᨕᨚᨊ ᨒᨅᨛᨊ ᨊᨙᨊᨙ ᨄᨀᨉᨙ ᨔᨘᨅᨘᨕᨙ᨞ ᨕᨙᨒᨙᨊᨗ ᨊᨔᨅ ᨉᨙ ᨊᨕᨛᨃ ᨊᨈᨗᨋᨚ ᨕᨚᨊ ᨕᨊᨊᨕᨙ ᨈᨛᨄ ᨆᨚᨈᨚ ᨈᨚᨊᨗ ᨒᨅᨛᨊ ᨊᨙᨊᨙᨊ᨞
ᨕᨋᨗᨊ ᨒᨕᨚ ᨆᨊᨔᨘ “ᨆᨀᨛᨔᨗᨊᨗ ᨕᨋᨗ ᨈᨚᨆᨋᨙ᨞ ᨄᨌᨄᨘᨑᨛ ᨆᨋᨙᨊᨗ ᨀᨘᨕᨕᨙ᨞”
ᨕᨗᨐᨈᨚᨔᨗ ᨕᨚᨊ ᨆᨌᨚᨕᨕᨙ ᨒᨕᨚᨊ ᨕᨋᨗᨊ ᨆᨊᨔᨘ᨞ ᨒᨕᨚᨊᨗ ᨄᨑᨙᨔᨕᨗ ᨕᨎᨑᨊ ᨊᨙᨊᨙ ᨄᨀᨉᨙ᨞ ᨕᨛᨃ ᨆᨘᨕᨗ ᨔᨙᨉᨗ᨞ ᨊᨔᨅ ᨕᨗᨐᨑᨚ ᨕᨎᨑᨊ ᨊᨙᨊᨙ ᨄᨀᨉᨙ ᨉᨘᨕ᨞ ᨍᨍᨗ ᨊᨄᨉᨊᨗ ᨕᨋᨗᨊ ᨆᨀᨛᨉ “ᨄᨒᨛᨔᨗᨓᨗ ᨊᨔᨘᨊ ᨕᨋᨗ!”
ᨕᨗᨐ ᨕᨚᨊ ᨀᨀᨊ ᨆᨙᨋᨙᨊᨗ ᨅᨚᨒ ᨊᨔᨄᨕᨗ ᨌᨗᨌᨕᨙ᨞ ᨊᨄᨉᨕᨗ ᨌᨗᨌᨕᨙ ᨆᨀᨛᨉ “ᨊᨀᨚ ᨕᨛᨃᨕᨗ ᨆᨈᨘ ᨊᨙᨊᨙ ᨄᨀᨉᨙ ᨒᨗᨔᨘ᨞ ᨊᨁᨚᨑ ᨀᨗ ᨈᨊᨕᨙ ᨕᨛᨈᨙᨀᨚ ᨑᨗ ᨓᨈ ᨄᨚᨒᨕᨙ᨞ ᨊᨀᨚ ᨆᨂᨚᨅᨗᨕᨗ ᨀᨗ ᨓᨈ ᨄᨚᨒᨕᨙ ᨕᨛᨈᨙᨀᨚ ᨑᨗ ᨑᨀᨗᨐᨕᨙ᨞ ᨊᨑᨙᨀᨚ ᨆᨂᨚᨅᨗᨕᨗ ᨑᨗ ᨑᨀᨗᨐᨕᨙ ᨕᨛᨈᨙᨀᨚ ᨑᨗ ᨌᨚᨄᨚ ᨅᨚᨒᨕᨙ᨞”
ᨆᨀᨙᨉᨕᨗ ᨌᨗᨌᨕᨙ “ᨕᨗᨐᨙ”᨞
ᨊᨔᨅ ᨕᨗᨐ ᨌᨗᨌᨕᨙ ᨆᨄᨛᨔᨙ ᨅᨅᨘᨕᨊ ᨆᨗᨈᨕᨗ ᨕᨗᨐᨕᨙ ᨒᨀᨒᨚᨒᨚ ᨉᨘᨕᨕᨙ ᨊᨔᨅ ᨊᨑᨄᨗᨊᨗ ᨓᨛᨈᨘᨊ ᨐᨋᨙ᨞
ᨍᨍᨗ ᨆᨊᨔᨘᨊᨗ ᨕᨚᨊᨕᨙ ᨕᨗᨊᨋᨙᨊ ᨕᨋᨗᨊ᨞ ᨊᨄᨘᨉᨊᨗ ᨕᨋᨗᨊ ᨆᨀᨛᨉ “ᨆᨋᨙᨊᨗ ᨕᨋᨗ”
ᨄᨘᨑᨕᨗ ᨆᨋᨙ ᨆᨀᨛᨉᨕᨗ ᨀᨀᨊ “ᨕᨄᨂᨘᨍᨘᨊᨚ!”
“ᨆᨄᨂᨘᨍᨘ ᨆᨁ?”
ᨆᨀᨛᨉᨕᨗ “ᨕᨄᨂᨘᨍᨘᨊᨚ ᨕᨋᨗ ᨊᨕᨗᨔᨒᨕᨗ ᨕᨗᨐᨕᨙ ᨅᨚᨒᨕᨙ᨞ ᨉᨙᨊᨈᨘ ᨊᨆᨕᨙᨈ ᨊ ᨕᨛᨃ ᨄᨚᨒᨙ ᨊᨙᨊᨙ ᨄᨀᨉᨙ ᨆᨕᨙᨒᨚ ᨆᨋᨙᨀᨗ”
ᨍᨍᨗ ᨆᨙᨈᨕᨘ ᨕᨋᨗᨊ᨞ ᨅᨚᨑᨚ ᨀᨔᨗ ᨆᨀᨉᨕᨘ-ᨀᨉᨕᨘ ᨀᨗ ᨀᨀᨊ᨞ ᨆᨀᨛᨉ “ᨕᨄᨂᨘᨍᨘᨊᨚ ᨆᨔᨗᨈ᨞ ᨈᨑᨚᨊᨗ ᨕᨗᨐ ᨁᨚᨒᨕᨗ ᨕᨎᨑᨊ ᨊᨙᨊᨙ ᨄᨀᨉᨙ ᨕᨗᨐᨑᨚ ᨔᨙᨉᨗᨕᨙ᨞ ᨈᨚ ᨆᨀᨅᨕᨙᨂᨛᨊ”
ᨄᨘᨑᨊᨗ ᨄᨉ ᨆᨋᨙ᨞ ᨄᨘᨑᨊᨗ ᨆᨄᨂᨘᨍᨘ᨞ ᨆᨀᨙᨉᨊᨗ ᨕᨋᨗᨊ “ᨕᨛᨃᨈᨘ ᨅᨚᨈᨚᨒᨚ ᨕᨚᨋᨚ ᨎᨓᨊ ᨊᨙᨊᨙ ᨄᨀᨉᨙ ᨑᨗ ᨑᨀᨗᨐᨕᨙ ᨆᨘᨕᨙᨋᨙ ᨆᨘᨕᨒ ᨊᨗᨈᨚᨈᨚ ᨍᨚᨀ!”
ᨍᨍᨗ ᨆᨙᨋᨙᨊᨗ ᨀᨔᨗ ᨕᨋᨗᨊ ᨆᨒᨕᨗ᨞ ᨕᨗᨐᨈᨚᨊᨗ ᨕᨒᨙᨊ ᨒᨚᨀᨕᨗ ᨁᨒᨕᨗ ᨕᨎᨑᨊ ᨊᨙᨊᨙ ᨄᨀᨉᨙ᨞ ᨄᨘᨑᨕᨗ ᨊᨁᨒ ᨕᨎᨑᨕᨙ ᨆᨉᨙᨌᨙ ᨈᨚᨊᨗ ᨕᨛᨃᨊ ᨕᨋᨗᨊ ᨊᨚ ᨄᨚᨒᨙ ᨅᨚᨒᨕᨙ ᨈᨚᨈᨚ ᨕᨗ ᨕᨗᨐᨑᨚ ᨅᨚᨈᨚᨒᨚᨕᨙ ᨕᨚᨋᨚ ᨎᨓᨊ ᨊᨙᨊᨙ ᨄᨀᨉᨙ᨞
ᨈᨚᨊᨊᨗ᨞ ᨕᨙᨋᨙᨊᨚ ᨕᨋᨗ ᨀᨗ ᨆᨚᨋᨗᨀᨘ᨞ ᨕᨀᨉᨕᨚ ᨆᨔᨛᨀᨚ ᨄᨀᨛᨔᨗᨂᨗᨈᨚᨕᨗ ᨕᨀᨈᨛᨊᨗᨊ ᨕᨗᨐᨈᨘ ᨅᨚᨈᨚᨒᨚᨕᨙ᨞”
ᨆᨀᨛᨔᨗᨊᨗ ᨈᨚᨊᨊ ᨕᨗᨐ ᨉᨘᨕ᨞ ᨊᨄᨍᨚᨀᨊᨗ ᨕᨎᨑᨕᨙ᨞ ᨕᨗᨐᨑᨚ ᨕᨎᨑᨕᨙ ᨈᨛᨒᨘ ᨁᨒᨊ᨞ ᨕᨛᨃ ᨁᨒ ᨐᨓ᨞ ᨕᨛᨃ ᨈᨛᨂ᨞ ᨕᨛᨃ ᨁᨒ ᨐᨔᨙ᨞ ᨉᨙ ᨊᨄᨉ ᨕᨎᨑᨈ ᨕᨗᨉᨗ ᨈᨔᨙᨉᨗᨆᨗ ᨁᨒᨊ᨞ ᨕᨗᨐ ᨕᨎᨑᨊ ᨊᨙᨊᨙ ᨄᨀᨉᨙ ᨈᨛᨒᨘ᨞ ᨍᨍᨗ ᨍᨌᨚᨅᨊᨗ ᨕᨗᨐ ᨕᨊᨊᨕᨙ ᨔᨗᨈ ᨕᨗ ᨑᨗᨐᨓᨊ᨞ ᨉᨙᨑᨙ ᨕᨎᨑᨕᨙ ᨉᨙᨑᨙ ᨀᨚᨒᨛᨔᨗ᨞ ᨊᨌᨚᨅᨔᨗ ᨁᨛᨈᨛ ᨁᨒ ᨑᨗᨈᨛᨂᨊ᨞ ᨆᨀᨑᨈᨙ ᨅᨈᨘᨕᨊ ᨔᨗᨋᨙᨑᨙ ᨕᨈᨑᨙ ᨅᨚᨒᨕᨙ᨞ ᨊᨌᨚᨅᨔᨗ ᨔᨗᨈᨕᨗ ᨁᨒ ᨑᨗᨕᨔᨙᨊ ᨒᨘᨈᨘ ᨆᨈᨂ ᨅᨗᨈᨑ᨞ ᨕᨗᨐᨑᨚ ᨕᨎᨑᨊ ᨊᨙᨊᨙ ᨄᨀᨉᨙ ᨕᨎᨑ ᨒᨕᨗ ᨆᨙᨈᨚ᨞ ᨉᨙ ᨊᨄᨉ ᨕᨎᨑ ᨈ ᨕᨗᨉᨗ᨞
ᨁᨃ ᨕᨚᨊ ᨕᨗᨐ ᨒᨅᨛᨊ ᨕᨊᨊᨕᨙ᨞ ᨆᨀᨚᨑᨚ ᨀᨄ ᨉᨘᨕ ᨐᨑᨙᨁ ᨈᨛᨒᨘ ᨆᨛᨊᨙ ᨒᨅᨛᨊ᨞ ᨕᨛᨃᨈᨚᨊᨗ ᨊᨙᨊᨙ ᨄᨀᨉᨙ ᨒᨗᨔᨘ᨞ ᨆᨙᨒᨚᨊᨗ ᨒᨗᨔᨘ ᨆᨋᨙᨕᨗ ᨕᨄᨚᨊ᨞ ᨊᨑᨈᨙᨕᨗ ᨈᨊᨕᨙ “ᨆᨁᨗᨍᨙ ᨉᨙᨁᨁ ᨔᨆᨛ-ᨔᨆᨛᨊ ᨕᨄᨚᨀᨘ᨞”
ᨊᨁᨚᨑᨕᨗ “ᨕᨚ ᨀᨄᨚᨀᨄᨚ ᨕᨚ ᨀᨄᨚᨀᨄᨚ!”
ᨆᨛᨈᨙᨕᨗ ᨌᨗᨌᨕᨙ ᨕᨀᨗ ᨅᨚᨒᨕᨙ ᨆᨀᨛᨉ “ᨕᨛᨃ ᨆᨘᨀ ᨆᨕᨗ ᨊᨙᨊᨙ᨞”
ᨆᨑᨗᨕᨚᨊᨗ ᨕᨈᨗᨊ ᨊᨙᨊᨙ ᨄᨀᨉᨙ ᨊᨔᨛ “ᨆᨎᨆᨛᨔᨗ ᨎᨓᨀᨘ ᨕᨗᨐᨕᨙ ᨆᨋᨙ ᨈᨕᨘ”
ᨔᨅ ᨀᨙᨁᨄᨔᨗ ᨓᨛᨈᨘ ᨊᨋᨙ ᨈᨕᨘ᨞ ᨈᨚᨒᨗ ᨕᨚᨒᨚᨀᨚᨒᨚᨆᨗ ᨅᨓ ᨊᨑᨘᨈᨘ᨞
ᨆᨋᨙᨕᨗ ᨅᨚᨒ ᨉᨙᨁᨁ ᨕᨄᨚᨊ᨞ ᨁᨚᨑᨔᨗ “ᨀᨄᨚᨀᨄᨚ ᨀᨙᨁᨚ ᨆᨚᨋᨚ?”
ᨆᨛᨈᨙᨔᨗ ᨌᨗᨌᨕᨙ ᨀᨗ ᨑᨀᨗᨐᨕᨙ ᨆᨀᨛᨉ “ᨕᨛᨃ ᨆᨘᨀ ᨆᨕᨗ ᨊᨙᨊᨙ”
ᨒᨘᨄᨛᨔᨗ ᨆᨙᨋᨙ ᨀᨗ ᨑᨀᨗᨐᨕᨙ ᨊᨙᨊᨙ ᨄᨀᨉᨙ ᨁᨚᨑᨔᨗ “ᨕᨚ ᨀᨄᨚᨀᨄᨚ ᨀᨙᨁᨀᨚ ᨆᨚᨋᨚ?”
ᨆᨛᨈᨙᨔᨗ ᨌᨗᨌᨕᨙ ᨀᨗ ᨌᨚᨄᨚ ᨅᨚᨒᨕᨙ ᨆᨀᨛᨉ “ᨕᨛᨃ ᨆᨘᨀ ᨆᨎᨙ ᨀᨚ ᨌᨚᨄᨚ ᨅᨚᨒᨕᨙ”
ᨈᨛᨄ ᨆᨙᨋᨙᨕᨗ ᨊᨙᨊᨙ ᨄᨀᨉᨙ ᨀᨗ ᨌᨚᨄᨚ ᨅᨚᨒᨕᨙ᨞ ᨉᨙᨁᨁ ᨕᨄᨚᨊ᨞ ᨊᨈᨗᨑᨚᨕᨗ ᨕᨛᨃ ᨕᨎᨑᨊ ᨆᨔᨒᨓᨘ ᨐᨚᨒᨚ᨞ ᨆᨔᨒᨓᨘ ᨆᨊᨗ ᨊᨈᨗᨑᨚ ᨉᨙ ᨊ ᨊᨆᨊᨛᨔ᨞ ᨁᨃ ᨒᨘᨄᨛ ᨊᨚ ᨕᨗᨈᨊ ᨊᨒᨕᨗ ᨕᨗᨐᨑᨚ ᨕᨎᨑᨊ ᨔᨙᨉᨗᨕᨙ ᨊᨄᨀᨛᨊᨕᨗ ᨁᨒ ᨊᨒᨇᨕᨗ᨞ ᨕᨗᨐᨕᨙ ᨕᨎᨑᨊ ᨊᨙᨊᨙ ᨄᨀᨉᨙ ᨔᨙᨉᨗᨕᨙ ᨆᨒᨛᨔᨗ᨞ ᨆᨒᨛᨔᨗᨄᨗ ᨊ ᨕᨗᨐᨑᨚ ᨕᨚᨊ ᨕᨎᨑ ᨊᨕᨚᨒ ᨕᨙ ᨕᨊᨊᨕᨙ ᨊᨔᨅ ᨕᨗᨐᨕᨙ ᨊᨙᨊᨙ ᨄᨀᨉᨙ ᨄᨒᨑᨗᨓᨗ᨞ ᨊᨑᨙᨀᨚ ᨕᨒᨙᨊ ᨈᨚᨊ ᨈᨕᨘᨕᨙ ᨅᨗᨐᨔ ᨄᨒᨑᨗᨕᨗ ᨕᨊᨘᨊ ᨔᨘᨀᨘᨈᨚᨊᨗᨈᨘ᨞ ᨆᨌᨄᨘ ᨒᨕᨚᨊᨗ ᨊᨀᨚ ᨄᨘᨊᨊᨈᨚᨖ ᨈᨚᨊᨂᨗᨕᨗ᨞
ᨊᨒᨇᨕᨗ᨞ ᨊ ᨉᨙ ᨊᨔᨗᨐᨁ ᨕᨙᨈᨊ ᨔᨗᨒᨛᨒᨘᨊ᨞ ᨊᨑ ᨆᨊᨛᨔᨊᨗ ᨐᨚᨒᨚ ᨊᨔᨛ᨞ “ᨀᨄᨚᨀᨄᨚᨀᨘ ᨈᨚᨂᨛᨊ ᨕᨐᨑᨚ ᨐᨚᨒᨚ᨞ ᨀᨄᨚᨀᨄᨚᨀᨘ ᨈᨚᨂᨛᨊ ᨕᨗᨐᨑᨚ ᨉᨘᨕᨕᨙ ᨆᨄᨉ ᨅᨘᨑᨊᨙ᨞ ᨕᨎᨑᨀᨘ ᨆᨈᨚ ᨊᨕᨚᨒ᨞”
ᨊᨕᨗᨐ ᨕᨙᨓᨊ ᨔᨗᨒᨛᨒᨘ ᨕᨗᨐᨕᨙ ᨕᨙᨒᨙᨕᨙ᨞ ᨀᨗ ᨒᨂᨗᨕᨙ ᨕᨗᨐᨔᨙ ᨄᨄᨉ ᨁᨘᨈᨘ ᨄᨑᨛᨄᨕᨙ᨞ ᨊᨕᨗᨐ ᨕᨎᨑᨊ ᨊᨙᨊᨙ ᨄᨀᨉᨙ ᨊᨀᨚ ᨆᨂᨙᨔᨘᨕᨛᨔᨘᨕᨗ ᨒᨑᨗ ᨆᨔᨘ ᨕᨁ ᨕᨄᨗ ᨄᨚᨒᨙ ᨑᨗ ᨕᨗᨂᨛᨊ ᨄᨚᨒᨙ ᨀᨗ ᨔᨘᨇᨊ᨞ ᨄᨚᨒᨙ ᨓᨛᨈᨘᨕᨙ ᨄᨉ ᨕᨙᨒᨚ ᨀᨆᨛ ᨒᨗᨊᨚ ᨊᨔᨅ ᨆᨄᨛᨈᨊᨗ᨞ ᨕᨗᨐ ᨆᨊ ᨁᨘᨈᨘᨕᨙ ᨉᨙ ᨊᨄᨍ᨞ ᨕᨘᨊᨗᨊᨆᨗ ᨕᨎᨑᨕᨙ ᨕᨗᨐ ᨔᨗᨒᨛᨒᨘᨕᨙ᨞ ᨅᨗᨒᨕᨙ ᨔᨗᨕᨋᨙᨕᨋᨙ᨞ ᨕᨗᨐᨆᨗᨑᨚ ᨕᨄᨗ ᨆᨛᨔᨘ ᨄᨚᨒᨙ ᨀᨗ ᨕᨗᨂᨛᨊ ᨕᨎᨑᨊ ᨊᨙᨊᨙ ᨄᨀᨉᨙ᨞ ᨔᨗᨀᨚᨆᨘᨕ ᨔᨗᨒᨇᨊ ᨁᨃᨊ ᨆᨌᨓᨙᨊᨗ᨞ ᨈᨚᨒᨗ ᨅᨚᨑᨚᨊᨗ ᨕᨋᨗᨊ “ᨆᨋᨔᨗᨀᨘᨈᨘ᨞ ᨆᨋᨑᨔᨗᨀᨘᨈᨘ᨞ ᨆᨌᨓᨙᨊᨗ ᨊᨙᨊᨙ ᨄᨀᨉᨙ᨞ ᨆᨌᨓᨙᨊᨗ᨞
ᨊᨔᨛ “ᨈᨑᨚᨆᨘᨕᨗ᨞ ᨈᨑᨚᨆᨘᨗᨕᨗ᨞
ᨉᨙ ᨄᨍᨊ ᨔᨗᨒᨇ᨞ ᨁᨃᨊ ᨆᨌᨓᨙ ᨒᨉᨛ᨞ ᨈᨛᨄ ᨆᨑᨗᨂᨛᨑ ᨕᨗ ᨀᨀᨊ᨞ ᨁᨗᨒᨗᨕᨗ ᨆᨔᨕᨗᨒᨙ᨞ ᨕᨛᨃᨈᨚᨂᨛᨊᨗ ᨊᨙᨊᨙ ᨄᨀᨉᨙ ᨕᨗᨆᨘᨋᨗᨊ᨞ “ᨕᨉᨙᨇᨛᨑᨛᨕᨗ ᨕᨉᨙᨇᨛᨑᨛᨕᨗ ᨕᨗᨐᨈᨘ ᨅᨚᨈᨚᨒᨚᨕᨙ ᨕᨚᨋᨚ ᨎᨓᨊ ᨊᨙᨊᨙ ᨄᨀᨉᨙ!”
ᨊᨕᨗᨐ ᨕᨋᨗᨊ ᨈᨛᨄ ᨊᨉᨙᨇᨛᨑᨛ ᨊᨚ᨞ ᨆᨁᨗᨖ ᨊᨈᨛᨄ ᨕᨗᨐᨑᨚ ᨅᨚᨈᨚᨒᨚᨕᨙ ᨈᨛᨄ ᨀᨗ ᨅᨈᨘᨕᨙ᨞ ᨈᨛᨆᨄᨘᨊ ᨅᨚᨈᨚᨒᨚ ᨆᨙᨋᨙᨈᨚᨊᨗ ᨊᨙᨊᨙ ᨄᨀᨉᨙ ᨈᨛᨄ ᨆᨈᨙ᨞
ᨍᨍᨗ ᨒᨛᨈᨘ ᨆᨀᨘᨀᨘᨕᨕᨙ ᨉᨙ ᨊᨗ ᨁᨁ ᨊᨙᨊᨙ ᨄᨀᨉᨙ ᨆᨈᨙᨊᨗ᨞ ᨕᨗᨐᨑᨚ ᨕᨊᨊᨕᨙ ᨔᨒᨆ ᨈᨚᨊᨗ᨞ ᨁᨃ ᨕᨗᨐᨑᨚ ᨕᨊᨊᨕᨙ ᨒᨘᨑᨘ ᨕᨒᨙᨊ ᨒᨙᨔᨘ ᨆᨒ ᨆᨊᨛᨕᨗ ᨕᨁᨁᨊ ᨊᨙᨊᨙ ᨄᨀᨉᨙ᨞ ᨕᨗᨐᨑᨚ ᨕᨊᨊᨕᨙ ᨔᨘᨁᨗᨊᨗ ᨆᨎᨆᨛ ᨎᨓᨊ ᨔᨅ ᨕᨁᨁᨊ ᨆᨊᨛ ᨊᨙᨊᨙ ᨄᨀᨉᨙ ᨊᨆᨊ᨞
