ᨕᨛᨃ ᨔᨙᨉᨗ ᨍᨚᨂ ᨈᨛᨆᨀ ᨑᨍᨊ ᨆᨀᨗᨊᨋᨙ ᨑᨗ ᨈᨛᨂᨊ ᨄᨉᨕᨙ᨞ ᨕᨗᨐᨑᨚ ᨒᨄᨚ ᨍᨚᨂ, ᨍᨚᨂ ᨆᨒᨛᨔᨕᨗ, ᨍᨚᨂ ᨈᨋᨘ᨞ ᨔᨗᨀᨘᨆ ᨍᨚᨀᨊ, ᨍᨚᨀᨊ ᨈᨛᨂ ᨄᨉᨕᨙ, ᨈᨛᨀᨚ ᨑᨘᨈᨘ ᨆᨘᨊᨗ ᨔᨙᨉᨗ ᨔᨗᨕᨄᨘ᨞ ᨕᨗᨐ ᨒᨄᨚ ᨍᨚᨂ ᨆᨚᨋᨚᨕᨗ ᨈᨛᨈᨚ ᨆᨗᨈᨕᨗ ᨀᨙᨉᨚᨊ ᨒᨄᨚ ᨀᨒᨄᨘ ᨕᨚᨊᨕᨙ᨞ ᨆᨛᨈᨙᨕᨗ ᨒᨄᨚ ᨍᨚᨂ ᨒᨕᨚ ᨑᨗ ᨒᨄᨛ ᨀᨒᨄᨘ ᨆᨀᨙᨉ “ᨕᨙ ᨀᨒᨄᨘ, ᨈᨑᨚᨔᨕᨗ ᨆᨒᨗᨈᨛᨒᨗᨈᨛ ᨅᨈᨙᨆᨘ ᨀᨙᨉᨚ, ᨈᨑᨚᨔᨕᨗ ᨆᨁᨈᨗᨁᨈᨗ ᨅᨈᨙᨆᨘ ᨍᨚᨀ᨞ ᨕᨁᨈᨘ ᨉᨉ-ᨉᨉᨆᨘ ᨀᨙᨉᨚ ᨔᨗᨕᨁᨈᨚ ᨕᨗᨊᨋᨙ ᨆᨘᨒᨙ ᨑᨘᨈᨘ ᨑᨙᨀᨚ ᨆᨀᨘᨕᨗᨈᨘ ᨅᨈᨙᨆᨘ ᨀᨙᨉᨚ᨞ ᨕᨗᨈᨕᨗᨀᨕᨙ ᨆᨁ ᨍᨚᨄᨀᨗ, ᨆᨁᨈᨗᨀ ᨀᨙᨉᨚ, ᨆᨒᨛᨔᨗᨀ ᨒᨑᨗ᨞ ᨍᨍᨗ ᨊᨀᨚ ᨕᨛᨃ ᨕᨗᨊᨋᨙ ᨔᨗᨆᨇᨛ ᨕᨑᨘᨈᨘᨕᨗ᨞ ᨊᨕᨗᨐ ᨕᨗᨀᨚ ᨄᨘᨑ ᨆᨊᨛᨄᨗ ᨕᨊᨗᨐ ᨈᨕᨘᨕᨙ ᨊᨄᨉ ᨈᨀᨉᨄᨗ᨞ ᨕᨁᨈᨘ ᨉᨚᨉᨚᨆᨘ᨞”
ᨆᨛᨈᨙᨕᨗ ᨒᨄᨚ ᨀᨒᨄᨘ ᨆᨀᨛᨉ “ᨈᨑᨚᨈᨚᨊᨗ ᨆᨀᨘᨈᨚᨆᨗ ᨑᨚ ᨄᨀᨘᨒᨙᨀᨘ᨞ ᨕᨙᨒᨚᨀ ᨆᨁ ᨊᨀᨚ ᨆᨀᨘᨈᨚᨆᨗᨖ᨞” ᨆᨀᨙᨉᨕᨗ ᨍᨚᨂᨕᨙ “ᨒᨗᨈᨛᨒᨗᨈᨛᨀᨗ ᨕᨒᨙᨆᨘ, ᨈᨑᨚᨕᨗ ᨆᨓᨈ, ᨁᨛᨈᨛᨕᨗ ᨅᨘᨀᨘᨅᨘᨀᨘᨆᨘ᨞ ᨊᨔᨅ ᨑᨙᨀᨚ ᨆᨀᨘᨊᨗᨈᨘ ᨀᨙᨉᨚᨀᨙᨉᨚᨆᨘ, ᨆᨀᨘᨈᨚᨆᨗᨈᨘ ᨕᨈᨘᨕᨚᨈᨕᨚᨆᨘ᨞” ᨆᨀᨉᨕᨗ ᨀᨒᨄᨘᨕᨙ “ᨈᨑᨚᨊᨗ ᨄᨉᨕᨚᨑᨚᨕᨊᨙ ᨐᨈᨚᨊᨖ ᨉᨒᨙᨀᨘ ᨕᨘᨑᨘᨈᨘ ᨕᨙ᨞” ᨕᨁᨆᨁᨃᨊᨗ ᨑᨗᨈᨘᨕᨈᨘᨕᨊᨗ ᨑᨚ ᨀᨒᨄᨘᨕᨙ᨞ ᨕᨗᨐ ᨕᨚᨊᨕᨙ ᨕᨁᨗᨕᨁᨗ ᨊᨄᨕᨘ ᨒᨄᨚ ᨍᨚᨂ ᨔᨗᨊᨗ ᨑᨗᨅᨕᨒᨗᨓᨗ ᨑᨗ ᨒᨄᨚ ᨀᨒᨄᨘ, ᨁᨃᨊ ᨔᨗᨊᨗ ᨔᨗᨑᨈᨙ ᨅᨗᨌᨑᨊ ᨒᨄᨚ ᨍᨚᨂ᨞ ᨕᨁᨊ ᨄᨉᨙ ᨆᨙᨏᨙᨈᨚᨊ ᨕᨀᨚᨑᨙᨕᨑᨙᨊ ᨒᨄᨚ ᨍᨚᨂ ᨒᨕᨚ ᨑᨗ ᨒᨄᨚ ᨀᨒᨄᨘ᨞
ᨆᨀᨛᨉᨕᨗ ᨒᨄᨚ ᨍᨚᨂ, “ᨕᨍ ᨅᨓᨊ ᨊ ᨆᨕᨙᨁ ᨅᨗᨌᨑᨆᨘ, ᨆᨕᨘ ᨉᨘᨓᨀᨚ, ᨆᨕᨘ ᨈᨛᨒᨘᨀᨚ, ᨊᨀᨚ ᨅᨔᨆᨘᨈᨘ ᨆᨕᨙᨒᨚ ᨆᨙᨓᨀ, ᨉᨙ ᨆᨘᨒᨙᨕᨗ ᨆᨙᨓᨀ᨞ ᨕᨛᨃ ᨄᨈᨍᨘᨆᨘ ᨆᨙᨓᨀ ᨆᨀᨒᨑᨗ?” ᨆᨛᨈᨙᨕᨗ ᨒᨄᨚ ᨀᨒᨄᨘ ᨆᨀᨛᨉ “ᨊᨁᨗ ᨊᨕᨛᨃ ᨕᨀᨒᨑᨗᨂᨛ ᨈᨄᨕᨘ? ᨐᨀᨚ ᨆᨀᨉᨀᨗ ᨈᨀᨒᨑᨗ, ᨕᨘᨕᨙᨓᨀᨚ ᨆᨕᨘᨊᨗ ᨆᨉᨚᨉᨚᨆᨘᨕ, ᨊᨕᨙᨀᨗᨐ ᨑᨙᨀᨚ ᨆᨘᨕᨙᨑᨀ ᨕᨘᨕᨘᨓᨀᨚ᨞” ᨆᨀᨛᨉᨕᨗ ᨒᨄᨚ ᨍᨚᨂ “ᨕᨊᨘᨊᨗ ᨄᨒᨙ ᨈᨀᨒᨑᨗ ᨆᨀᨘᨀᨘᨕᨕᨙ᨞” ᨆᨅᨒᨗ ᨕᨉᨕᨗ ᨒᨄᨚ ᨀᨒᨄᨘ ᨆᨀᨛᨉ “ᨅᨍᨄᨗ ᨄᨉᨕᨚᨑᨚᨕᨊᨙ ᨈᨑᨚᨊ ᨐᨚᨒᨚ ᨒᨗᨔᨘ ᨑᨗ ᨅᨚᨒᨀᨘ ᨆᨋᨙ ᨆᨕᨙᨁᨕᨙᨁ, ᨅᨑᨙ ᨆᨓᨈᨓᨈᨀ ᨒᨑᨗ ᨅᨍ᨞”
ᨆᨀᨘᨈᨊᨊᨗ ᨒᨄᨚ ᨍᨚᨂ ᨆᨀᨛᨉ “ᨕᨁᨊ ᨑᨗᨒᨚᨒᨚᨂᨛ ᨑᨙᨀᨚ ᨆᨘᨅᨙᨈᨀ ᨒᨑᨗ ᨕᨗᨐᨑᨙᨁ ᨊ ᨕᨘᨅᨙᨈᨀᨚ?” ᨆᨀᨙᨉᨕᨗ ᨒᨄᨚ ᨀᨒᨄᨘ “ᨕᨗᨉᨗ ᨅᨓᨊ ᨕᨁᨗᨕᨁᨗ ᨈᨔᨛ ᨕᨗᨐᨈᨚᨊ ᨕᨘᨈᨘᨑᨘᨔᨗ᨞” ᨆᨀᨛᨉᨕᨚ ᨍᨚᨂᨕᨙ “ᨈᨙᨁᨈᨙᨁᨊ ᨑᨗᨅᨙᨈ ᨒᨛᨈᨘ ᨑᨗ ᨔᨙᨉᨗᨕᨙ ᨕᨌᨚ ᨅᨍ ᨊᨑᨙᨀᨚ ᨈᨚ ᨆᨀᨒᨑᨗ, ᨑᨗᨍᨅᨂᨗ ᨕᨘᨒᨘᨊ, ᨕᨙᨒᨚ ᨆᨘᨀᨚ?” ᨆᨀᨛᨉᨕᨗ ᨀᨒᨄᨘᨕᨙ “ᨕᨗᨐᨙ, ᨆᨉᨙᨌᨙᨊᨗ᨞ ᨊᨑᨚᨊ ᨒᨗᨔᨘ ᨒᨕᨚ ᨑᨗ ᨅᨚᨒᨀᨘ᨞”
ᨒᨗᨔᨘᨊᨗ ᨒᨄᨚ ᨀᨒᨄᨘ ᨉᨙᨉᨙ ᨒᨕᨚ ᨑᨗ ᨅᨚᨒᨊ ᨒᨛᨈᨘᨕᨗ ᨑᨗ ᨅᨚᨒᨊ, ᨆᨈᨛᨑᨘᨕᨗ ᨑᨗ ᨄᨚᨁᨓᨊ᨞ ᨆᨀᨛᨉᨕᨗ ᨒᨄᨚ ᨀᨒᨄᨘ ᨉᨛᨋᨛ ᨒᨕᨚ ᨑᨗ ᨄᨚᨁᨓᨊ ” ᨑᨗ ᨓᨛᨈᨘ ᨆᨔᨘᨀᨘ ᨍᨚᨀᨍᨚᨀ ᨑᨗ ᨈᨛᨂᨊ ᨄᨉᨕᨙ, ᨕᨛᨃ ᨔᨙᨉᨗ ᨍᨚᨂ ᨕᨘᨑᨘᨈᨘ ᨆᨒᨉᨛ ᨔᨛᨊᨀ ᨊᨈᨘᨕᨈᨘᨕᨕᨗ᨞ ᨕᨛᨃ ᨆᨊᨛᨊᨗ ᨕᨉᨘ ᨀᨘᨄᨚᨔᨗᨔᨗᨈ ᨊᨄᨕᨘ᨞ ᨊᨈᨘᨊᨈᨘᨊᨕᨗ ᨒᨉᨛ ᨆᨊᨀ᨞ ᨕᨙᨒᨚᨀ ᨊᨕᨙᨓ ᨆᨀᨒᨑᨗᨐ, ᨊᨕᨗᨔᨛ ᨆᨀᨛᨉ ᨈᨕᨘ ᨉᨚᨉᨚᨀ ᨊᨆᨕᨙᨒᨚᨀ ᨊᨕᨙᨓ᨞” ᨆᨀᨛᨉᨕᨗ ᨄᨚᨁᨓᨊ “ᨕᨙᨓᨕᨗ ᨕᨘᨄᨊᨕᨘᨄᨊ ᨊᨙᨑᨀᨚ, ᨕᨙᨓᨕᨗ᨞” ᨆᨀᨙᨉᨕᨚ ᨒᨄᨚ ᨀᨒᨄᨘ “ᨄᨙᨀᨚᨁᨗ ᨅᨈᨙᨀᨘ ᨆᨙᨓᨕᨗ?” ᨆᨀᨛᨉᨕᨗ ᨄᨚᨁᨓᨊ “ᨅᨍ ᨕᨒᨕᨗ ᨔᨛᨄᨘᨒᨚ ᨔᨗᨅᨓᨆᨘ, ᨕᨛᨃ ᨔᨛᨄᨘᨒᨚ ᨆᨘᨈᨗᨓᨗ ᨒᨕᨚ ᨑᨗ ᨈᨛᨂᨊ ᨄᨉᨕᨙ᨞ ᨑᨙᨀᨚ ᨒᨛᨈᨘᨀᨚ ᨑᨗ ᨈᨛᨂᨊ ᨄᨉᨕᨙ᨞ ᨕᨗᨐᨑᨚ ᨍᨗᨍᨗᨕᨗ ᨕᨒᨙᨊ ᨈᨔᨙᨉᨗᨔᨙᨉᨗ, ᨀᨗᨑᨀᨗᨑ ᨕᨙᨒᨊ ᨈᨔᨛᨄᨘᨒᨚ ᨑᨛᨄ ᨅᨙᨒᨊ, ᨕᨛᨃᨔᨗ ᨔᨗᨅᨓᨆᨘ ᨆᨘᨈᨑᨚ᨞ ᨊᨕᨗᨐ ᨕᨗᨀᨚ ᨕᨀᨘᨀᨚ ᨑᨗ ᨕᨌᨚᨕᨙ ᨆᨚᨋᨚ᨞”
ᨅᨚᨍᨅᨍᨊ, ᨍᨚᨀᨊᨗ᨞ ᨊᨒᨊᨗ ᨔᨗᨅᨓᨊ ᨔᨛᨄᨘᨒᨚ, ᨊᨍᨗᨍᨗᨕᨗ ᨄᨉᨄᨉᨈᨚᨖ ᨑᨗ ᨄᨁᨘᨑᨘᨕᨗ ᨑᨗ ᨄᨚᨁᨓᨊ᨞ ᨄᨘᨑᨕᨗ ᨊᨍᨗᨍᨗ, ᨕᨛᨃᨈᨚᨊᨗ ᨈᨀᨄᨚ ᨒᨄᨚ ᨍᨚᨂ᨞ ᨁᨚᨑᨊᨗ ᨒᨄᨚ ᨍᨚᨂ ᨆᨀᨛᨉ “ᨀᨙᨁᨊᨚ ᨀᨒᨚᨄᨘ?” ᨆᨛᨈᨙᨊᨗ ᨒᨄᨚ ᨀᨒᨄᨘ ᨆᨀᨛᨉ “ᨕᨛᨃᨀ ᨆᨕᨗ ᨄᨉᨕᨚᨑᨚᨕᨊᨙ᨞” ᨆᨁᨗ ᨆᨕᨙᨒᨚᨊᨚ ᨆᨙᨓᨀ ᨆᨀᨒᨑᨗ? ᨕᨉᨊ ᨒᨄᨚ ᨍᨚᨂᨕᨙ᨞ ᨆᨀᨉᨕᨗ ᨀᨒᨄᨘᨕᨙ “ᨆᨀᨘᨊᨗ ᨑᨚ ᨊᨔᨅ ᨕᨍᨏᨗᨂᨛ᨞”
ᨆᨀᨛᨉᨕᨗ ᨍᨚᨂᨕᨙ “ᨆᨉᨙᨌᨙᨊᨗ᨞ ᨆᨘᨒᨙᨆᨁ ᨆᨀᨕᨗ ᨕᨍᨙᨆᨘ᨞ ᨆᨙᨁ ᨆᨘᨁᨈᨘ ᨆᨘᨕᨋᨙ?” ᨕᨉᨊ ᨒᨄᨚ ᨍᨚᨂ᨞ ᨉᨙ ᨈᨛᨀᨘ ᨕᨍᨅᨂᨗᨊ ᨕᨘᨒᨘᨆᨘ ᨕᨗᨐᨕᨙ᨞” ᨕᨗᨐ ᨒᨄᨚ ᨀᨒᨄᨘ ᨆᨀᨛᨉᨕᨗ “ᨉᨙ ᨊᨔᨗᨔᨛ ᨕᨙᨒᨚ ᨕᨘᨒᨙᨊ ᨄᨘᨓ ᨕᨒᨈᨕᨒ᨞
ᨊᨕᨘᨒᨙ ᨈᨚᨂᨛᨖᨑᨚ ᨉᨙ ᨕᨘᨓᨘᨒᨙᨔᨗ ᨒᨑᨗᨕᨙ᨞ ᨊᨔᨅ ᨆᨕᨙᨁ ᨓᨙᨁ ᨕᨘᨓᨋᨙ, ᨆᨛᨔᨚ ᨒᨉᨛᨀ᨞ ᨄᨙᨉᨙ ᨉᨙᨊ ᨕᨘᨒᨕᨗ ᨆᨀᨕᨗ ᨕᨍᨙᨀᨘ᨞ ᨊᨀᨗᨐ ᨈᨑᨚ ᨈᨚᨊᨖ ᨆᨘᨍᨅᨂᨗ ᨕᨘᨒᨘᨀᨘ, ᨕᨔᨒᨛ ᨆᨘᨄᨉᨘᨄᨆᨘᨘᨕᨗ ᨕᨍᨏᨗᨂᨛᨈ᨞”
ᨕᨁ ᨆᨀᨛᨉ ᨕᨗ ᨒᨄᨚ ᨍᨚᨂ “ᨆᨁᨕᨗ, ᨈᨄᨆᨘᨒᨊ ᨒᨑᨗ?” ᨆᨛᨈᨙ ᨀᨒᨄᨘᨕᨙ ᨆᨀᨛᨉ “ᨕᨗᨉᨗᨔᨈᨘ” ᨑᨙᨀᨚ ᨆᨀᨘᨕᨗ ᨈᨘ ᨆᨉᨙᨌᨙᨊᨗ ᨈᨄᨆᨘᨒᨊ ᨒᨑᨗ” ᨕᨉᨊ ᨒᨄᨚ ᨍᨚᨂ᨞ ᨆᨅᨙᨑᨙᨊᨗ ᨄᨑᨙᨈ ᨍᨚᨂᨕᨙ ᨆᨀᨛᨉ “ᨕᨘᨄᨊ ᨓᨀᨛᨉ ᨔᨙᨉᨗ ᨉᨘᨓ ᨈᨛᨒᨘ ᨆᨄᨆᨘᨒᨊᨗ ᨒᨑᨗ᨞” ᨈᨛᨔᨗᨕᨁᨕᨗ ᨕᨗᨐᨊ, ᨊᨕᨘᨈᨙᨔᨗ ᨒᨄᨚ ᨀᨒᨄᨘ ᨆᨀᨛᨉ “ᨔᨉᨗᨐᨊᨚᨁ?” ᨆᨀᨛᨉᨕᨗ ᨀᨒᨄᨘᨕᨙ᨞ “ᨔᨉᨗᨐᨊ᨞” ᨆᨀᨛᨉᨕᨗ ᨍᨚᨂᨕᨙ “ᨕᨙᨃᨒᨗᨂᨕᨗ ᨆᨈᨘ᨞ ᨔᨙᨉᨗ ᨉᨘᨓ ᨈᨛᨒᨘ!” ᨒᨑᨗ ᨄᨛᨈᨘᨊᨗᨖ ᨍᨚᨂᨕᨙ᨞
ᨆᨈᨛᨂᨕᨗ ᨒᨑᨗ, ᨁᨚᨑᨊᨗ ᨍᨚᨂᨕᨙ ᨆᨀᨛᨉ “ᨀᨙᨁᨊᨚ ᨒᨄᨚ ᨀᨒᨄᨘ?” ᨆᨛᨈᨙᨕᨗ ᨒᨄᨚ ᨀᨒᨄᨘ ᨕᨛᨃᨕᨙ ᨑᨗᨐᨚᨒᨚᨊ ᨆᨀᨛᨉ “ᨕᨛᨃᨀᨆᨕᨗᨕᨙ᨞”
ᨆᨀᨛᨉᨕᨗ ᨕᨗᨊᨗᨊᨓᨊ ᨍᨚᨂᨕᨙ ᨊᨅᨙᨈᨀᨔ ᨒᨑᨗ ᨐᨚᨒᨚᨕᨗ ᨊᨒ᨞ ᨕᨁ ᨊᨁᨔᨔᨗ ᨒᨑᨗᨕᨙ᨞ ᨊᨉᨄᨗᨔᨗ ᨕᨚᨋᨚ ᨊᨕᨚᨋᨚᨕᨗ ᨉᨙᨋᨙ ᨀᨒᨄᨗᨕᨙ ᨆᨄᨅᨒᨗ, ᨆᨀᨘᨈᨊᨔᨗ᨞ ᨆᨀᨛᨉᨔᨗ ᨀᨒᨄᨘᨕᨙ “ᨕᨛᨃᨀ ᨑᨗᨐᨚᨒᨚ, ᨕᨛᨃᨀ ᨆᨕᨗ ᨁᨚᨔᨚᨊᨗ ᨒᨑᨗᨕᨙ᨞ ᨉᨙ ᨈᨛᨀᨘ ᨕᨍᨅᨂᨗᨊ ᨕᨘᨒᨘᨆᨘ, ᨕᨘᨅᨙᨈᨀᨚ ᨒᨑᨗ᨞” ᨊᨁᨚᨔᨚᨊᨗ ᨒᨑᨗᨕᨙ ᨒᨄᨚ ᨍᨚᨂ᨞ ᨊᨄᨔᨃ ᨈᨚᨂᨛ ᨒᨑᨗᨊ᨞ ᨊᨄᨔ ᨕᨒᨙᨊ ᨒᨑᨗ, ᨆᨀᨛᨉ “ᨊᨄᨋᨔᨀ ᨒᨄᨚ ᨀᨒᨄᨘ᨞”
ᨊᨑᨄᨗᨕᨗ ᨊᨕᨚᨋᨚᨕᨗᨕᨙ ᨆᨄᨙᨅᨒᨗ ᨀᨒᨄᨘᨕᨙ, ᨆᨀᨘᨈᨊᨔᨗ ᨆᨀᨛᨉ “ᨀᨙᨁᨊᨚ ᨒᨄᨚ ᨀᨒᨄᨘ?” ᨁᨚᨑᨔᨗ ᨕᨛᨃᨕᨙ ᨑᨗᨐᨚᨒᨚᨊ ᨆᨀᨛᨉ “ᨕᨛᨃᨀ ᨆᨕᨗᨕᨙ!” ᨆᨀᨛᨉᨕᨗ ᨒᨒᨛ ᨕᨈᨗᨊ ᨒᨄᨚ ᨍᨚᨂ “ᨉᨙ ᨈᨚᨂᨛᨔ ᨕᨛᨃ ᨓᨛᨉᨗ ᨑᨗᨌᨄ᨞ ᨊᨄᨋᨔᨀ ᨕᨗᨐᨕᨙ᨞” ᨕᨁ ᨊᨄᨔᨃᨊᨗ ᨒᨑᨗᨊ, ᨊᨌᨄᨘ ᨓᨈᨊ᨞ ᨁᨃᨊ ᨆᨌᨓᨙ ᨕᨌᨚᨕᨙ ᨆᨀᨛᨉ “ᨕᨛᨃᨊ ᨆᨕᨙ᨞” ᨊᨄᨔᨋᨙ ᨒᨗᨆᨊ ᨒᨘᨄᨛᨒᨘᨄᨛ᨞ ᨆᨀᨛᨉᨕᨗ ᨍᨚᨂᨕᨙ “ᨆᨘᨔᨚᨒᨂᨗᨊᨈᨘ ᨄᨉᨕᨚᨑᨚᨕᨊᨙ᨞ ᨕᨗᨊ ᨆᨘᨍᨅᨂᨗ ᨈᨚᨂᨛᨊᨗ ᨕᨘᨒᨘᨀᨘ᨞”
ᨒᨛᨈᨘᨕᨗ ᨀᨘᨕᨑᨚ ᨒᨄᨚ ᨍᨚᨂ ᨆᨔᨑ ᨕᨗᨊᨗᨊᨓ ᨆᨒᨚᨈᨚ ᨆᨊᨛ ᨕᨒᨙᨊ ᨊᨈᨘᨑᨘᨂᨗ ᨄᨘᨔᨛ ᨈᨚᨒᨚᨑᨚ ᨈᨚᨄ ᨒᨗᨒᨊ᨞ ᨒᨙᨒᨙ ᨔᨙᨑᨙᨔᨙᨑᨙ ᨉᨙ ᨊᨕᨘᨒᨙᨕᨗ ᨆᨀᨕᨗ ᨕᨍᨙᨊ᨞ ᨆᨀᨛᨉᨊᨗ “ᨉᨙ ᨈᨚᨂᨛᨖᨈᨘ ᨄᨒᨙ ᨓᨛᨉᨗ ᨑᨗᨌᨄ᨞”
ᨊᨀᨚ ᨕᨘᨓᨗᨈᨕᨗ ᨉᨚᨉᨚ ᨉᨚᨉᨚᨆᨘ ᨉᨙ ᨕᨘᨄᨔᨗᨈᨗᨊᨍᨕᨗ ᨓᨛᨉᨗᨀ ᨆᨘᨌᨕᨘ ᨒᨑᨗ᨞ ᨓᨙᨀ ᨆᨘᨌᨕᨘᨀ ᨒᨑᨗ᨞ ᨆᨘᨍᨅᨂᨗ ᨈᨚᨂᨛᨊᨗᨈᨘ ᨕᨘᨒᨘᨀᨘ᨞ ᨆᨘᨌᨕᨗ ᨓᨈᨀ᨞”
ᨕᨗᨐᨊᨑᨚ ᨊᨔᨅᨀᨗ ᨊᨉᨙ ᨊᨓᨛᨉᨗ ᨑᨗᨌᨄ ᨔᨙᨉᨗᨕᨙ ᨕᨁᨁ᨞
