ᨕᨛᨃ ᨁᨑᨙ ᨔᨙᨕᨘᨓ ᨓᨛᨈᨘ ᨊᨒᨕᨚ ᨕᨒᨕᨘ ᨑᨗ ᨅᨚᨊᨙ ᨒᨈᨚᨅᨍ᨞ ᨕᨛᨃᨕᨗ ᨔᨗᨑᨈᨘ ᨆᨔᨗᨒᨚ᨞ ᨑᨗᨔᨘᨑᨚᨕᨗ ᨉᨈᨘᨕᨙ ᨑᨗ ᨔᨚᨄᨙ ᨒᨕᨚ ᨒᨗᨑᨒᨗᨑᨕᨗ ᨈᨊᨕᨙ ᨑᨗ ᨅᨚᨊᨙ᨞ ᨄᨙᨆᨁᨕᨗ ᨕᨁ ᨕᨔᨅᨑᨛᨊ ᨊᨍᨍᨗ ᨓᨗᨔᨙᨔᨊ ᨕᨛᨋᨛᨕᨙ ᨑᨗ ᨈᨄᨑᨛᨊ ᨀᨘᨕᨈᨚᨄ ᨊᨅᨘᨒᨚ ᨔᨗᨅᨈ ᨈᨕᨘ ᨈᨛᨅᨛᨊ᨞
ᨔᨄᨘᨊᨗ ᨊᨒᨗᨑᨒᨗᨑ ᨈᨊᨊ ᨅᨚᨊᨙ᨞ ᨅᨚᨊᨙ ᨑᨗᨕᨓ᨞ ᨅᨚᨊᨙ ᨑᨗ ᨕᨈ᨞ ᨅᨚᨊᨙ ᨕᨚᨑᨕᨗ᨞ ᨅᨚᨊᨙ ᨕᨒᨕᨘ᨞ ᨔᨗᨈᨊᨗ ᨒᨆᨙᨒᨚ ᨈᨔᨘᨕᨒᨙ ᨑᨗ ᨅᨑᨘᨁ ᨑᨗ ᨅᨑᨘᨁ ᨆᨑᨍᨊ ᨅᨚᨊᨙ᨞ ᨆᨀᨛᨉᨕᨗ ᨒᨆᨙᨒᨚ ᨑᨗ ᨒᨈᨚᨅᨍ “ᨕᨘᨄᨚᨆᨙᨊᨔᨕᨗ ᨔᨗᨕᨍᨗ ᨈᨚ ᨕᨌᨊ ᨔᨚᨄᨙ ᨆᨔᨕᨗᨒᨚ ᨊᨑᨗᨂᨛᨑᨗᨂᨗ ᨕᨒᨙᨊ ᨊᨍᨚᨄ-ᨍᨚᨄᨈᨚ ᨑᨗ ᨅᨚᨒᨀᨘ᨞ ᨊᨕᨗᨈᨕᨗ ᨕᨀᨔᨗᨕᨔᨂᨛᨊ ᨔᨗᨕᨍᨗ ᨈᨚ ᨅᨚᨊᨙᨊ᨞”
ᨆᨄᨅᨒᨗᨊᨗ ᨒᨈᨚ ᨅᨍ ᨆᨀᨛᨉ “ᨑᨛᨊᨘᨀᨘ ᨑᨚ ᨆᨀᨑᨛᨊᨘ ᨔᨕᨍᨗ ᨕᨛᨃᨀᨘ ᨆᨔᨗᨒᨕᨚ ᨈᨉᨘᨄᨕᨗ ᨍᨚᨄᨍᨚᨄ ᨑᨗ ᨅᨚᨒ ᨈᨘᨉᨂᨛᨈ᨞ ᨊᨕᨗ ᨆᨂᨘᨍᨘᨊ ᨒᨕᨚ ᨕᨚᨑᨕᨗ ᨑᨗ ᨔᨚᨄᨙ ᨑᨗ ᨕᨛᨔᨚᨊ ᨔᨂᨉᨗᨕᨙ᨞ ᨀᨙᨁᨊ ᨑᨗᨓᨛᨈᨘ ᨈᨕᨙᨒᨚᨑᨛᨀᨛ ᨕᨙᨃ ᨆᨈᨘᨉᨈᨘᨉ ᨑᨗ ᨅᨚᨒᨈ?”
“ᨀᨙᨁ ᨄᨉ ᨊᨑᨙᨀᨚ ᨅᨍ ᨑᨗ ᨈᨛᨂᨕᨛᨔᨚᨕᨙ ᨆᨉᨙᨌᨙᨊᨗ” ᨕᨉᨊ ᨒᨆᨙᨒᨚ᨞
“ᨕᨗᨐᨙ ᨆᨉᨙᨌᨙᨊᨗ!” ᨄᨄᨅᨒᨗᨊ ᨒᨈᨚᨅᨍ᨞
ᨕᨗᨐᨑᨚ ᨕᨛᨔᨚᨕᨙ ᨊᨄᨈᨘᨑᨘᨊᨕᨗ ᨔᨗᨕᨓᨙᨊ ᨅᨕᨗᨊᨙᨊ ᨒᨆᨙᨒᨚ ᨆᨉᨓᨉᨓ᨞ ᨒᨛᨅᨗ ᨔᨗᨑᨈᨘ ᨈᨕᨘ ᨆᨈᨍᨛ ᨆᨋᨙ ᨕᨛᨔᨚ ᨅᨍ᨞ ᨊᨕᨗᨐ ᨅᨍᨊ ᨑᨗ ᨕᨒᨙᨀᨙᨒᨙᨊ ᨁᨙᨑᨙᨊᨗ ᨉᨘᨓᨀᨍᨘ ᨅᨙᨅᨙ ᨔᨗᨒᨕᨚ ᨔᨗᨕᨑᨙ-ᨕᨑᨙ ᨄᨘᨒᨚᨊ ᨆᨊᨘ᨞ ᨄᨄᨅᨍᨊ ᨕᨛᨃ ᨈᨚᨂᨛᨊᨗ ᨒᨈᨚᨅᨍ ᨔᨗᨑᨈᨘ ᨆᨔᨗᨒᨚ ᨄᨉ ᨍᨚᨄ ᨆᨉᨚᨒᨚ-ᨉᨚᨒᨚᨑᨛ ᨒᨕᨚ ᨑᨗ ᨅᨚᨒᨊ ᨒᨆᨙᨒᨚ᨞ ᨆᨉᨙᨌᨙ ᨒᨛᨅᨊ ᨑᨗ ᨈᨛᨂᨕᨛᨔᨚᨊ ᨊᨈᨀᨄᨚ ᨒᨈᨚᨅᨍ ᨑᨗ ᨕᨚᨒᨚ ᨈᨅᨚ-ᨈᨅᨚᨕᨊ ᨒᨆᨙᨒᨚ᨞ ᨆᨄᨛᨑᨗᨄᨛᨑᨗᨊᨗ ᨄᨘᨊ ᨅᨚᨒᨕᨙ ᨊᨚ ᨉᨘᨄᨕᨗᨓᨗ ᨓᨗ ᨊᨋᨙᨂᨗ ᨆᨙᨋᨙ ᨑᨗ ᨅᨚᨒ ᨊᨄᨉᨘᨉ ᨑᨗ ᨈᨄᨙᨑᨙ ᨆᨒᨚᨍ᨞
“ᨆᨗᨈᨊᨗᨈᨘ ᨅᨚᨒ ᨀᨔᨗᨕᨔᨗ?” ᨕᨉᨊ ᨒᨆᨙᨒᨚ ᨇᨘᨀ ᨅᨗᨌᨑ᨞
ᨊᨄᨅᨒᨗ ᨒᨈᨚᨅᨍ ᨆᨀᨛᨉ “ᨈᨚᨂᨛ ᨔᨛᨊᨔ ᨈᨕᨙᨑᨉᨕᨙ ᨔᨗᨕᨍᨗ ᨕᨄ ᨉᨙ ᨆᨙᨆᨛᨔ ᨅᨚᨒ ᨈᨛᨀᨔᨗᨕᨔᨗ᨞ ᨕᨄ ᨆᨕᨘ ᨕᨒᨙᨊ ᨈᨛᨄᨘᨊᨕᨗᨈᨚ ᨄᨘᨊ ᨆᨗᨊᨔ ᨔᨘᨁᨗ᨞” ᨌᨅᨙᨑᨘ ᨀᨌᨗᨊᨗ ᨒᨆᨙᨒᨚ ᨊᨔᨅ ᨊᨔᨛᨉᨗᨂᨗ ᨕᨒᨙᨊ ᨑᨗᨄᨈᨅᨘᨈᨘ ᨄᨌᨛ ᨑᨗ ᨈᨚᨕᨊᨊ᨞ ᨊᨔᨚᨇᨘᨂᨗᨔᨗ ᨅᨗᨌᨑᨊ ᨆᨀᨛᨉ “ᨈᨛᨆᨀ ᨑᨚ ᨑᨛᨊᨘᨀᨘ ᨔᨕᨗᨍᨗ ᨕᨃᨈ ᨆᨘᨕᨊᨙ ᨄᨅᨚᨒᨙᨂᨛᨂ ᨆᨗᨊᨔᨀᨘ ᨑᨗᨂᨛ-ᨑᨗᨂᨛᨂᨗ ᨓᨗ ᨕᨒᨙᨈ ᨆᨔᨗᨒᨕᨚ ᨍᨚᨄ-ᨍᨚᨄ ᨑᨗ ᨅᨚᨒᨀᨘ᨞”
ᨆᨄᨅᨒᨗᨔᨗ ᨒᨈᨚᨅᨍ “ᨊᨄᨔᨛ ᨆᨙᨆᨛ ᨄᨘᨕᨀᨛ ᨉᨈᨘ ᨕᨙ ᨑᨗ ᨔᨚᨄᨙ ᨆᨀᨛᨉ᨞ ᨊᨑᨙᨀᨚ ᨒᨛᨈᨘᨀᨚ ᨑᨗᨒᨘᨄᨘᨊ ᨈᨕᨘ ᨕᨙ ᨕᨗᨐ ᨒᨒᨚ ᨆᨘᨄᨚᨁᨕᨘ ᨊ ᨈᨍᨛᨕᨙ ᨄᨘᨊ ᨒᨗᨄᨘᨕᨙ᨞ ᨆᨀᨘᨈᨚᨑᨚ ᨊᨑᨙᨀᨚ ᨆᨋᨙᨀᨚ ᨑᨗ ᨔᨙᨕᨘᨓ ᨅᨚᨒ ᨈᨘᨑᨘᨔᨗ ᨕᨙᨒᨚᨊ ᨄᨘᨊ ᨅᨚᨒᨕᨙ᨞ ᨊᨔᨅ ᨕᨗᨐᨈᨘ ᨄᨘᨊᨕᨙ ᨕᨑᨘ ᨆᨃᨕᨘᨕᨗ ᨑᨗ ᨒᨒᨛᨇᨚᨒᨊ᨞ ᨈᨄᨚᨆᨗᨊᨔᨀᨛ ᨔᨗᨕᨍᨗ ᨑᨗᨂᨛ-ᨑᨗᨂᨛᨂᨗᨓᨗ ᨒᨛᨀᨚ ᨍᨚᨄᨍᨚᨄ ᨒᨕᨚ ᨑᨗᨅᨚᨒᨈ᨞ ᨈᨈᨍᨛ ᨑᨗᨅᨚᨒ ᨈᨘᨉᨂᨛᨈ᨞ ᨕᨁ ᨊᨀᨗᨕᨔᨆᨈᨘᨑᨘᨊ ᨆᨔᨚᨒᨚ ᨈᨛᨆᨅᨀᨘ᨞ ᨈᨛᨆᨄᨘᨑᨘᨀᨛ᨞ ᨈᨛᨆᨀᨎᨑ᨞ ᨀᨘᨕᨆᨛᨂᨗ ᨈᨚᨆᨑᨗᨂᨛ ᨍᨚᨄᨍᨄ᨞ ᨊᨀᨗᨄᨈᨘᨍᨘᨕᨗ ᨒᨛᨈᨘᨕᨙ ᨑᨗ ᨅᨚᨒᨈ ᨑᨗ ᨆᨈᨛᨂ ᨅᨗᨈᨑᨚᨊᨚ ᨆᨈ ᨈᨗᨀ ᨕᨙᨉᨙ᨞”
ᨄᨔᨛᨔᨗ ᨊᨔᨛᨉᨗ ᨕᨒᨙᨊ ᨒᨆᨙᨒᨚ᨞ ᨕᨄ ᨈᨛᨊ ᨔᨛᨊ-ᨔᨛᨊᨕᨗᨔ ᨑᨗ ᨄᨚᨁᨕᨘᨀᨛ ᨆᨊᨛ ᨆᨒᨛᨇᨘ-ᨒᨛᨇᨘ ᨔᨗᨊᨗᨊ ᨊᨄᨚᨕᨉᨕᨙ᨞ ᨈᨛᨆᨄᨛᨒᨈᨚᨄ ᨈᨘᨉᨊ ᨈᨚᨕᨊᨕᨙ ᨆᨄᨈᨒᨊᨗ ᨆᨀᨘᨋᨕᨗᨕᨙ᨞ ᨔᨗᨊᨗᨊ ᨄᨑᨙᨓ ᨕᨋᨙᨕᨙ ᨄᨗᨏᨛ ᨆᨊᨛ᨞
ᨊᨕᨗᨐ ᨔᨀᨛᨊᨊ ᨄᨈᨒᨕᨙ᨞ ᨆᨀᨛᨉᨊᨗ ᨒᨆᨙᨒᨚ ᨑᨗ ᨈᨚᨕᨊᨊ᨞ ᨆᨉᨙᨌᨙ ᨔᨗᨕᨍᨗ ᨄᨉ ᨈᨆᨔᨙᨕᨚ-ᨔᨙᨕᨚᨕᨗ “ᨕᨗᨐᨈᨚᨆᨗᨈᨗ ᨆᨀ ᨔᨚᨄᨙ ᨕᨍ ᨈᨄᨔᨗᨒᨕᨗᨂᨛᨕᨗ᨞”
ᨄᨘᨑᨕᨗᨀᨘᨕ ᨄᨉ ᨆᨋᨙᨊᨗ ᨒᨈᨚᨅᨍ ᨆᨔᨗᨒᨚ ᨑᨗᨉᨘᨕ ᨑᨗ ᨄᨘᨊ ᨅᨚᨒᨕᨙ᨞ ᨕᨗᨐ ᨔᨚᨑᨚ ᨒᨈᨚᨅᨍ ᨕᨗᨐ ᨔᨚᨑᨚ ᨆᨊᨛᨈᨚ ᨔᨗᨒᨚᨊ᨞ ᨄᨘᨑᨊᨆᨘᨕ ᨄᨉ ᨆᨗᨊᨘ᨞ ᨊᨄᨉ ᨊᨉᨙᨇᨛᨑᨛ ᨄᨑᨙᨓ ᨕᨋᨙᨊ ᨊᨚ ᨑᨗ ᨈᨊᨕᨙ᨞ ᨆᨀᨑᨛᨄ-ᨑᨛᨄᨀᨊᨗ ᨄᨛᨊᨙ ᨕᨛᨋᨛᨂᨙ ᨆᨃᨚᨕᨙ ᨈᨁᨛᨄ ᨑᨗ ᨈᨊᨕᨙ᨞ ᨕᨒᨗᨂᨂᨊᨗ ᨒᨆᨙᨒᨚ ᨔᨗᨒᨚ ᨔᨗᨊᨗᨊ ᨈᨕᨘ ᨈᨘᨑᨘᨕᨙ ᨊᨀᨔᨚᨒ-ᨔᨚᨒ! “ᨆᨒᨛᨅᨚᨀᨗᨔ ᨊᨈᨑᨚ ᨄᨃᨕᨘᨀᨛ ᨈᨚᨍᨂᨛᨊ!”
ᨆᨛᨈᨙᨊᨗ ᨒᨈᨚᨅᨍ “ᨉᨙᨔ ᨔᨗᨕᨍᨗ ᨊ ᨀᨗᨆᨒᨗ᨞ ᨕᨉᨈᨆᨘᨕ ᨀᨗᨈᨘᨑᨘᨔᨗ ᨑᨗ ᨆᨀᨛᨉᨈ᨞ ᨈᨄᨄᨉ-ᨄᨉᨕᨗ ᨑᨙᨀᨚ ᨑᨗ ᨔᨚᨄᨙ᨞ ᨕᨍ ᨈᨄᨔᨗᨒᨕᨗᨂᨛᨂᨗ᨞ ᨊᨕᨗᨐ ᨕᨉᨛ ᨕᨅᨗᨐᨔᨈ ᨑᨗ ᨔᨚᨄᨙ᨞ ᨑᨙᨀᨚ ᨄᨘᨑᨀᨗ ᨆᨋᨙ ᨔᨗᨊᨗᨊ ᨄᨘᨑᨕᨙ ᨑᨗᨄᨀᨙ ᨆᨋᨙ᨞ ᨑᨗᨕᨅᨙᨐ ᨆᨊᨛᨂᨗ ᨑᨗ ᨈᨊᨕᨙ᨞”
“ᨕᨗᨐᨈᨘ ᨄᨒᨙ ᨔᨗᨕᨍᨗ ᨈᨄᨔᨒ᨞ ᨕᨉᨇᨛᨂᨛ ᨆᨊᨛ ᨔᨗᨕᨍᨗᨆᨘ ᨈᨚᨅᨚᨊᨙᨓᨙ ᨊᨑᨙᨀᨚ ᨈᨄᨒᨛᨔᨚᨕᨗ ᨕᨉᨊ!” ᨕᨉᨊ ᨄᨅᨙᨒᨗᨊ ᨒᨆᨙᨒᨚ᨞ ᨊᨆᨀᨛᨉ ᨑᨗᨒᨒᨛ ᨕᨈᨗᨊ “ᨕᨗᨐᨚ ᨕᨛᨃᨆᨈᨘ ᨔᨗᨓᨛᨈᨘ ᨑᨗ ᨔᨚᨄᨙ ᨊ ᨀᨗᨕᨀᨅᨒᨛ᨞
ᨄᨘᨑᨀᨘᨕ ᨆᨙᨒᨕᨘ ᨕᨔᨗᨆᨊᨗ ᨒᨈᨚᨅᨍ ᨆᨔᨒᨚ᨞ ᨊᨉᨘᨄᨈᨚᨊᨗ ᨒᨆᨙᨒᨚ ᨆᨔᨗᨒᨚ ᨒᨕᨚ ᨕᨚᨑᨕᨗ ᨍᨚᨄ-ᨍᨚᨄ ᨑᨗ ᨔᨚᨄᨙ᨞
ᨆᨀᨙᨉᨕᨗ ᨒᨆᨙᨒᨚ “ᨑᨙᨀᨘᨕ ᨊᨕᨙᨒᨚᨑᨛ ᨉᨙᨓᨈᨕᨙ᨞ ᨕᨛᨃᨀᨈᨘ ᨆᨔᨗᨈ-ᨔᨗᨈ ᨒᨕᨚ ᨕᨚᨑᨕᨗ᨞ ᨊᨔᨅ ᨆᨕᨗᨈ ᨆᨙᨆᨛᨊ ᨆᨌᨗᨊ ᨆᨗᨈᨕᨗ ᨔᨚᨄᨙ᨞ ᨒᨗᨕᨘ ᨔᨘᨁᨗ ᨈᨛᨀᨒᨕᨙ᨞ ᨕᨄᨁᨗᨔ ᨕᨄ ᨆᨘᨈᨇᨊᨕᨗᨀᨛ ᨔᨗᨕᨍᨗ᨞”
ᨄᨘᨑᨕᨗᨀᨘᨕ ᨄᨄ ᨅᨍᨕᨙ ᨒᨕᨚ ᨕᨚᨑᨕᨗ ᨑᨗ ᨔᨚᨄᨙ ᨒᨈᨚᨅᨍ ᨆᨔᨗᨒᨚ᨞ ᨈᨛᨔᨗᨕᨁᨈᨚ ᨕᨗᨈᨊ ᨕᨛᨃ ᨈᨚᨂᨛᨊᨗ ᨒᨆᨙᨒᨚ ᨈᨛᨒᨘ ᨑᨈᨘᨕᨗ ᨆᨔᨗᨒᨚ ᨄᨚᨒᨙ ᨑᨗ ᨕᨒᨕᨘ ᨅᨚᨊᨙ᨞ ᨀᨘᨕᨊᨗ ᨑᨗ ᨅᨑᨘᨁ ᨅᨑᨘᨊ ᨔᨚᨄᨙ ᨑᨗᨄᨅᨛᨊᨗ-ᨓᨛᨊᨗ᨞ ᨕᨗᨐᨑᨚ ᨅᨑᨘᨁᨕᨙ ᨑᨗ ᨕᨈᨕᨘᨊ ᨑᨗ ᨕᨅᨗᨐᨚᨊ ᨀᨘᨕᨈᨚᨄ ᨑᨗᨆᨘᨋᨗᨊ ᨔᨂᨛ ᨄᨒ ᨕᨘᨈᨗ᨞ ᨊᨄᨈᨘᨑᨘᨊᨗ ᨒᨈᨚᨅᨍ ᨆᨀᨘᨋᨕᨗ ᨈᨚ ᨔᨚᨄᨙ ᨕᨙ ᨆᨊᨔᨘᨂᨛᨂᨗ ᨈᨚ ᨅᨚᨊᨙᨕᨙ᨞ ᨆᨔᨘᨑᨚ ᨔᨙᨓ ᨈᨚᨊᨗ ᨄᨛᨊᨙ ᨄᨍᨛ᨞
ᨊᨕᨗᨐ ᨊᨑᨄᨗᨊ ᨓᨛᨈᨘ ᨕᨋᨙ ᨆᨀᨛᨉᨊᨗ ᨒᨈᨚᨅᨍ ᨑᨗ ᨒᨆᨙᨒᨚ ᨆᨔᨗᨑᨂᨛ᨞ “ᨕᨗᨐ ᨕᨘᨓᨙᨒᨕᨘ ᨑᨗ ᨈᨚᨕᨊᨀᨛ ᨈᨚ ᨅᨚᨊᨙᨓᨙ ᨀᨘᨕᨆᨛᨂᨗ ᨊᨄᨉᨘᨄᨕᨗ ᨈᨛᨒᨚᨕᨗᨊ ᨔᨚᨄᨙ-ᨅᨚᨊᨙ ᨄᨘᨑ ᨊᨔᨗᨀᨉᨚᨕᨗ ᨄᨉ ᨄᨘᨕ ᨑᨗ ᨕᨚᨒᨚᨈ᨞ ᨆᨀᨛᨉᨕᨗ ᨕᨗᨐ ᨊᨒᨙᨍ ᨈᨚ ᨅᨚᨊᨙ ᨑᨗ ᨈᨊᨊ ᨔᨚᨄᨙ ᨔᨚᨄᨙᨕᨗ᨞ ᨆᨀᨘᨈᨚᨑᨚ ᨔᨚᨄᨙᨕᨙ ᨕᨗᨐ ᨊᨒᨙᨍᨕᨗ ᨑᨗ ᨈᨊᨊ ᨅᨚᨊᨙ ᨅᨚᨊᨙᨕᨗ᨞ ᨍᨍᨗ ᨕᨘᨓᨙᨒᨚᨊᨗ ᨑᨗᨔᨗᨊᨗᨊ ᨔᨗᨕᨍᨗᨀᨘ ᨄᨚᨒᨙ ᨑᨗ ᨅᨚᨊᨙ᨞ ᨅᨑ ᨊᨁᨗ ᨈᨚ ᨔᨚᨄᨙ ᨕᨒᨙᨊ ᨀᨘᨕᨕᨙ ᨊᨑᨙᨀᨚ ᨄᨘᨑᨕᨗ ᨆᨋᨙ᨞ ᨊᨁᨛᨋᨘᨂᨛ ᨆᨊᨛᨕᨗ ᨄᨑᨙᨓ ᨕᨋᨙᨊ ᨕᨗᨊᨘᨂᨛᨊ ᨊᨚ ᨑᨗ ᨈᨊᨕᨙ᨞ ᨕᨗᨐᨈᨚᨄ ᨕᨘᨄᨚᨕᨉ-ᨕᨉᨕᨗ ᨑᨗ ᨔᨗᨕᨍᨗ ᨆᨒᨛᨅᨗᨀᨘ ᨈᨚᨕᨌᨊ ᨅᨚᨊᨙ᨞ ᨈᨚᨔᨘᨕᨒᨙ ᨆᨔᨗᨑᨂᨛ ᨆᨀᨛᨉ ᨊᨄᨕᨉᨛᨕᨗ ᨈᨚ ᨔᨚᨄᨙᨕᨙ ᨊᨑᨙᨀᨚ ᨕᨛᨃᨕᨗ ᨔᨗᨕᨍᨗᨊ ᨆᨔᨛᨑᨚᨕᨙ ᨊᨄᨚᨑᨙᨋᨙᨂᨗ ᨀᨘᨔᨛᨈᨚᨄ ᨊᨄᨀᨒᨛᨅᨗ᨞ ᨀᨘᨕᨕ ᨑᨗ ᨄᨍᨛᨕᨙ ᨑᨗᨒᨄᨗᨀᨗ ᨌᨚᨒᨗ ᨉᨕᨘ ᨕᨘᨈᨗ ᨊᨄᨈᨒ ᨕᨗᨊᨋᨙ ᨊᨛᨊᨗᨐ ᨄᨀᨋᨙᨐ᨞ ᨕᨈᨑᨚ ᨓᨕᨙ ᨑᨗᨊᨘᨊ ᨅᨚᨉ (ᨈᨀᨙ ᨕᨓᨚ) ᨅᨑᨘ ᨑᨗᨈᨘᨅ᨞ ᨊᨔᨅ ᨈᨛᨒᨛᨆᨘᨕᨗ ᨎᨓᨊ ᨔᨗᨕᨍᨗᨆᨘ ᨑᨗ ᨔᨚᨄᨙ ᨄᨋᨙᨕᨗ ᨊᨛᨊᨗᨐ ᨄᨕᨗᨊᨘᨂᨗ ᨔᨗᨕᨍᨗ ᨆᨒᨛᨅᨗᨊ ᨑᨗᨄᨑᨙᨓ ᨄᨘᨑᨕᨙᨊ ᨊᨋᨙᨕᨗ ᨊᨛᨊᨗᨐ ᨊᨕᨗᨊᨘᨂᨗ ᨈᨚᨒᨕᨗ᨞”
ᨀᨉᨚ-ᨀᨉᨚᨊᨗ ᨆᨄᨘᨍᨗ ᨊᨀᨑᨊ ᨄᨄᨈᨚᨂᨛ ᨔᨗᨊᨗᨊ ᨑᨂᨛᨊ ᨒᨆᨙᨒᨚ᨞ ᨕᨗᨐᨆᨘᨕᨔ ᨕᨒᨙᨊ ᨒᨆᨙᨒᨚ ᨕᨗ ᨊᨄᨚᨕᨉ ᨑᨗᨒᨒᨛ ᨕᨈᨗᨊ “ᨊᨀᨒᨀ ᨈᨚ ᨔᨚᨄᨙᨕᨙ”
